Pli tar, bann Izraelit ti ankor en fwa aret servi Zeova e konmans ador bann fo bondye. Pandan set an, bann Madyanit ti vol bann zannimo e detri plantasyon bann Izraelit. Pour ki bann Madyanit pa atak zot, bann Izraelit ti bezwen kasyet dan bann kavern ek montanny. Zot ti sipliy Zeova pour sov zot. Alor, Zeova ti anvoy en lanz kot en zenn onm ki apel Gideonn. Sa lanz ti dir: ‘Zeova in swazir ou pour vin en gerye pwisan.’ Gideonn ti demande: ‘Ki mannyer mon kapab sov Izrael? Mon en nanryen ditou.’

Ki mannyer Gideonn ti konnen ki Zeova in swazir li? I ti tal en lapo mouton avek son lalenn ater e dir Zeova: ‘Bomaten si sa lalenn i mouye akoz laroze e ater i sek, mon pou konnen ki ou anvi mon sov Izrael.’ Lannmen bomaten, lalenn ti tou tranpe me ater ti sek! Apre sa, Gideonn ti demann Zeova pour ki son lannmen bomaten, lalenn i sek me ater i mouye. Ler sa ti arive, Gideonn ti asire ki Zeova ti’n swazir li. I ti prepar son bann solda pour al lager avek bann Madyanit.

 Zeova ti dir Gideonn: ‘Mon pou fer bann Izraelit ganny laviktwar. Me vi ki zot annan en kantite solda, zot kapab krwar ki zot in ganny laviktwar lo zot menm. Dir tou dimoun ki per pour retourn kot zot.’ Apepre 22,000 solda ti retourn kot zot e 10,000 ti reste. Apre Zeova ti dir: ‘I ankor annan tro bokou solda. Anmenn zot kot larivyer e dir zot bwar delo. Gard zis bann ki veye pangar lennmi i vin atak zot anmezir ki zot bwar.’ Zis 300 zonm ki ti veye anmezir zot ti bwar delo. Zeova ti promet ki zis sa 300 zonm ti pou ranport laviktwar lo sa 135,000 solda Madyanit.

Pandan lannwit, Zeova ti dir Gideonn: ‘I’n ariv ler pour atak bann Madyanit!’ Gideonn ti donn sak solda en tronpet ek en resipyan avek en flanbo ladan. I ti dir zot: ‘Get mwan e fer egzakteman parey mwan.’ Gideonn ti soufle son tronpet, kraz son resipyan, lev zot flanbo e kriye: ‘Lepe Zeova e Gideonn!’ Tou le 300 zonm ti fer parey. Bann Madyanit ti vreman per e tay partou partou. Dan sa konfizyon, zot ti konmans atak kanmarad. Ankor en fwa, Zeova ti ed bann Izraelit ranport laviktwar lo zot lennmi.