Fee sɛɛ lɛ, Israelbii lɛ kpa Yehowa jamɔ ekoŋŋ, ni amɛbɔi amale nyɔŋmɔi jamɔ. Midianbii lɛ ju Israelbii lɛ akooloi ni amɛfite nibii ni amɛdu yɛ amɛŋmɔji lɛ amli lɛ. Enɛ tee nɔ afii kpawo sɔŋŋ. Israelbii lɛ bɔi teemɔ yɛ tɛkploi amli bɔ ni afee ni Midianbii lɛ akaye amɛ awui. Amɛkpa Yehowa fai ni ehere amɛ. No hewɔ lɛ, Yehowa tsu ŋwɛibɔfo ko kɛtee oblanyo ko ni atsɛɔ lɛ Gideon lɛ ŋɔɔ. Ŋwɛibɔfo lɛ kɛɛ lɛ akɛ: ‘Yehowa ehala bo akɛ okpɔ̃ ewebii lɛ.’ Shi Gideon bi lɛ akɛ: ‘Namɔ ji mi ni mahere Israelbii lɛ?’

Te Gideon baafee tɛŋŋ ena akɛ, Yehowa ehala lɛ akɛ ekpɔ̃ Israelbii lɛ? Ekɛ too hetsɔi fɔ̃ shikpɔŋ, ni ekɛɛ Yehowa akɛ: ‘Kɛ́ be ni je baatsɛre lɛ, bɔ́ efɔ too hetsɔi lɛ shi shikpɔŋ lɛ egbi lɛ, no baatsɔɔ akɛ oosumɔ ni mahere Israelbii lɛ.’ Be ni je tsɛre lɛ, too hetsɔi lɛ efɔ tsɔɔ shi shikpɔŋ lɛ egbi! Shi Gideon kɛɛ Yehowa akɛ, enɔ jetsɛremɔ lɛ, ehã too hetsɔi lɛ agbi ni shikpɔŋ lɛ afɔ. Yehowa bo Gideon toi. Ehã too hetsɔi lɛ gbi ni shikpɔŋ lɛ fɔ. Enɛ hã Gideon ná nɔmimaa akɛ, Yehowa ehala lɛ. Ebua esraafoi lɛ anaa koni amɛkɛ Midianbii lɛ ayawu.

 Yehowa kɛɛ Gideon akɛ: ‘Mahã Israelbii lɛ aye kunim. Shi asraafoi ni kɛ bo yaa lɛ ayi fa tsɔ, no hewɔ lɛ ekolɛ nyɛbaakɛɛ akɛ nyɛ diɛŋtsɛ nyɛhewalɛ naa nyɛye kunim lɛ. Kɛɛmɔ amɛ akɛ kɛ́ mɔ ko miishe gbeyei lɛ, eya shĩa.’ Asraafoi lɛ ateŋ mɛi 22,000 tee shĩa, ni eshwɛ mɛi 10,000. Yehowa kɛɛ lɛ akɛ: ‘Asraafoi lɛ ayi fa lolo. Okɛ amɛ aya faa lɛ naa, ni okɛɛ amɛ akɛ amɛnu nu lɛ eko. Mɛi ni baahã amɛhiɛ ahi amɛhe nɔ be ni amɛnuɔ nu lɛ, amɛ okɛbaaya ta lɛ.’ Asraafoi lɛ ateŋ mɛi 300 pɛ hã amɛhiɛ hi amɛhe nɔ. Yehowa wo Gideon shi akɛ, asraafoi fioo nɛɛ anɔ ebaatsɔ eye Midian asraafoi 135,000 lɛ anɔ kunim.

Nakai nyɔɔŋ lɛ mli lɛ, Yehowa kɛɛ Gideon akɛ: ‘Nyɛtutuaa Midianbii lɛ!’ Gideon hã esraafoi lɛ bɛji kɛ gbɛ́i wuji ni akɛ kanei ewo mli. Ekɛɛ amɛ akɛ: ‘Nyɛkwɛa mi, ni nyɛfea nɔ ni mafee lɛ pɛpɛɛpɛ.’ Gideon kpã ebɛlɛ lɛ, ejwa egbɛ́ lɛ, ni ewo ekane lɛ nɔ. Kɛkɛ ni ebolɔ akɛ: ‘Yehowa klante lɛ kɛ Gideon nɔ lɛ!’ Asraafoi 300 lɛ fɛɛ fee nakai nɔŋŋ. Midianbii lɛ atsui fã ni amɛwó foi ní amɛnaaa he ni amɛyaa. Amɛyiŋ futu ni amɛbɔi amɛhe gbee. Shi kome ekoŋŋ lɛ, Yehowa ye ebua Israelbii lɛ ni amɛye amɛhenyɛlɔi lɛ anɔ kunim.