Imwin tabeua te tai, a a manga kitana naba Iehova tibun Iteraera ao a taromaurii atua aika kewe. I nanon itiua te ririki ao tibuni Mirian a kikimoai aia man tibun Iteraera ao n urui arokaia. Ibukini kamanoaia mairouia tibuni Mirian, a a karabaia tibun Iteraera n taian nangananga ao maunga. A bubutiia Iehova bwa e na kamaiuia. Ngaia are e a kanakoa te anera Iehova nakon te rorobuaka n ataei ae Kiteon. E taku te anera: ‘E a tia n rineiko Iehova ngkoe ae te tia buaka ae korakora.’ E titiraki Kiteon ni kangai: ‘N na kangaa ni kamaiuia tibun Iteraera? Bon te kabanea ni mangori ngai.’

E na kangaa n ataia Kiteon bwa e rineia Iehova? E kaaki buraen te tiibu i aontano ao e taku nakon Iehova: ‘Ngkana e mwaimwai n te aoi buraen te tiibu aei n te moaningabong ma e mwautakataka aontano, I a ataia ngkanne ae ko tangirai bwa N na kamaiuia tibun Iteraera.’ N te ingabong are imwina, e a maratingo buraen te tiibu ao e mwautakataka aontano! Ma e a manga bubutii Kiteon bwa n te ingabong are imwina, e na mwautakataka buraen te tiibu ao e na mwaimwai aontano. Ngke e riki anne, e a kakoauaa raoi Kiteon bwa e rineia Iehova. Ao e a botiia ana tautia bwa a na buakania tibuni Mirian.

 E taku Iehova nakoni Kiteon: ‘N na angania tibun Iteraera te tokanikai. Ma ibukina bwa a rangi ni bati am tautia, kam kona n iangoia bwa kam tokanikai n te buaka n oini korakorami. Tuanga ane e maaku bwa e na okira mwengana.’ Ngaia are a a okiri mwengaia tautia aika 22,000 ao a tiku 10,000. E a manga taku Iehova: ‘A bon rangi ni bati naba tautia. Kairiia nakon te karaanga, ao tuangia bwa a na moi n ranna. Rineiia tii naake a tarataraiia taani kairiribai ngke a moi.’ Tii 300 mai buakoia mwaane ake a teimatoa n taratara ngke a moi. E berita Iehova bwa a na tokanikai mwaane aika tii tabeman aikai i aoia aia tautia tibuni Mirian aika 135,000.

N te tairiki anne ao e taku Iehova nakoni Kiteon: ‘Aio ngkai ami tai ni buakania tibuni Mirian!’ Ao Kiteon e angania ana aomata taiani buu ao kaatibu aika bubura ma taian oi aika karabaaki i nanoia. Ao e kangai nakoia: “Tarataraai ao karaoa raoi te bwai ae I karaoia.” Ao e katanga ana buu Kiteon, e ibea te kaatibu, e katiotioa ana oi ao e tatakarua ni kangai: “Ana kabaang Iehova ao ana kabaang Kiteon!” A bane ni kakairi irouna ana aomata ake 300. A rangi ni maaku tibuni Mirian ao a a biri n takaka. A a mangaongao aia iango, ao a a buaka i marenaia. E a manga buokiia naba tibun Iteraera Iehova bwa a na tokanikai i aoia taani kairiribai nakoia.