Nacheme Ziitli vergessed d Israelite Jehova wider und beted falschi Götter a. Sibe Jahr lang stehled d Midianiter ihri Tier und mached ihri Ernti kaputt. Zum sich Schütze, verstecked sich d Israelite i Höhline und i de Berge. Si rüefed zu Jehova, dass er si rettet. Drum schickt er en Engel zumene junge Maa, wo Gideon heisst. De Engel seit: «Jehova het dich usgwählt. Du wirsch en starche Chrieger sii.» De Gideon fragt ihn: «Wie söll ich denn Israel rette? Ich bin doch überhaupt nid wichtig!»

De Gideon wett sicher sii, dass Jehova würklich ihn usgwählt het. Drum leit er es Schaf-Fell uf de Bode und seit zu Jehova: «Wenn das Fell morn am Morge vom Tau nass isch, de Bode aber troche, denn cha ich mir sicher sii, dass du mich wirsch bruche, um Israel z rette.» Am nöchschte Morge isch s Fell pflotschnass, aber de Bode isch troche. Denn bittet de Gideon, dass am nöchschte Morge s Fell troche bliibt und de Bode defür nass isch. Genau das passiert. Jetzt isch de Gideon sicher: Jehova het ihn usgwählt. Er versammlet d Soldate, um gege d Midianiter z kämpfe.

Jehova seit zum Gideon: «Ich wird de Israelite de Siig gee. Ihr sind aber z vil Soldate. Drum chönnted ihr denke, dass ihr de Kampf allei gwunne hend, ohni mini Hilf. Säg allne, wo Angscht hend, si sölled hei gah.» Denn göhnd 22 000 Soldate wider hei; aber 10 000 bliibed. Nachher seit Jehova: «Es sind immer no z vil. Gang mit ihne zum Bach und säg ihne, si sölled Wasser trinke. Wähl nume die us, wo bim Trinke umelueged und ufpassed, öb Feinde chömmed.» Nume 300 Männer passed uf. Jehova verspricht, dass die chlii Gruppe di 135 000 Soldate vo de Midianiter wird besiige. 

I de Nacht seit Jehova zum Gideon: «Jetzt isch Ziit, d Midianiter azgriife.» De Gideon git sine Männer Hörner und grossi Chrüeg mitere Fackle din. Er seit: «Lueged mir zue und macheds mir genau nache.» De Gideon blast is Horn, verschlaat de Chrueg, schwenkt d Fackle hii und her und rüeft: «S Schwert vo Jehova und vom Gideon!» Sini 300 Männer mached genau s Gliiche. D Midianiter chömmed panischi Angscht über und springed i alli Richtige devo. I dem Durenand göhnd si ufenand los und fanged unterenand a z kämpfe. Einisch meh hilft Jehova de Israelite, gege ihri Feinde z gwünne.