Oʼttushii nachikuaʼa na israeliitakana sünain aʼwaajaa tü maleiwayaasükalüirua otta motushi Jeʼwaa naaʼin. Müliashii maʼin naya natuma na madianiitakana soʼu akaratshi juya, naʼluwajüin namüʼlüin otta najaʼttirüin napünajüin. Ounjulaashii na israeliitakana noulia saaʼu tü uuchikalüirua otta suluʼu koʼushii. Soʼu wanee kaʼi, nachuntaka kaaliinwaa na israeliitakana nümüin Jeʼwaa. Nuluwataaka Jeʼwaa wanee aapiee süpüla naashajaain nümaa Gedeón. «Nüneeküin pia Jeʼwaa süpüla puʼtteʼerüinjanain na israeliitakana», nümaka chi aapieekai nümüin Gedeón. Nusoutaka Gedeón: «¿Jamüshi tayainjachika oʼtteʼerüin na israeliitakana? Nnojoishi taya eʼnnaajünüin sutuma wayuu».

Nütüjawee aaʼu Gedeón shiimainre nüneekünüin nutuma Jeʼwaa. ¿Kasaka naaʼinrüin? Niʼitaain wanee kuluutchon mmoluʼu, nümaka nümüin Jeʼwaa: «Chüʼrüle tapüla wattaʼa wattachon maalü kuluutkat tüü sümaa josoin tü mmakat, tatüjaweerü aaʼu tayain chi püneekakai süpüla toʼtteʼerüin na israeliitakana». Waneemüin kaʼi, chüʼtsü nüpüla tü kuluutkat otta jososü tü mmakat. Nümaka joo nümüin Maleiwa: «Müleka shiale chüʼlüin tü mmakat jee josole tü kuluutkat, tatüjaweerü aaʼu tayain chi püneekakai». Ekeraajüsü tia nuchuntakat Gedeón nümüin Jeʼwaa. Makalaka nunoujain Gedeón nüneekünüin nutuma Jeʼwaa. Mapa,  nükotchojirüin Gedeón na nusurulaatsekana süpüla nütkaainjachin namaa na madianiitakana.

Nümaka Jeʼwaa nümüin Gedeón: «Takaliinjeena jia süpüla jükanajüin na madianiitakana, shiajaʼa neʼe wattain maʼin jaalii, anashii müleka naleʼejüle nachikuaʼa nepialuʼumüin na surulaat mmotkana suulia majüin nanüiki: ‹Akanajüshii waya süka wattain waalii›». Noʼunaka nepialuʼumüin 22.000 surulaat jee makataka 10.000 surulaat. «Wainmayülia maʼin wayuu pümaa, anashii müleka pümaale naya süpüla nasüin wüin chaa luwopuluʼumüin, naya püneeka na surulaat nnojoliikana ejepülaain sünain asaa wüin otta na eejakana aaʼin», nümaka Jeʼwaa. Eeshii neʼe 300 surulaat eejakana aaʼin. Nüküjain Jeʼwaa nümüin Gedeón nayamüleenain 135.000 surulaat madianiita nakajee na 300 surulaat nümaakana.

Müshi Jeʼwaa nümüin Gedeón soʼu aikat tia: «Püshuta naaʼu na madianiitakana». Naapaka Gedeón namüin na surulaatkana wanee suʼuwa paaʼa, amüchi otta wanee sikoʼu suluʼu tü amüchikat. «Jülüja jaaʼin tü taaʼinrajatkat, jüshataiwa tachiirua», nümaka namüin. Niʼyalajitka Gedeón tü suʼuwakat paaʼa, nüsottüin tü amüchikat otta yalejewain müsü nutuma tü sikoʼukat jee nuʼwaataka: «Nüchajaruutse Jeʼwaa otta Gedeón». Müshiʼiya na nümaajanakana, aʼwaatüshii. Nainkuuka aaʼin na naʼünüükana, apantajaashii jee atkaajiraashii neʼe naya namaajiraa. Akanajuushii nachikuaʼa nutuma Jeʼwaa naʼünüü na israeliitakana.