To ojlẹ de godo, Islaeli sọ lẹkọ sọn Jehovah dè bo jẹ yẹwhe lalo lẹ sẹ̀n ji. E ko yì owhe ṣinawe bọ Midianinu lẹ to kanlin Islaelivi lẹ tọn fìn bosọ to jinukun yetọn lẹ hẹngble. Nado gán sọn alọ Midianinu lẹ tọn mẹ, Islaelivi lẹ nọ whlá yede do oslò lẹ mẹ podọ do osó lẹ mẹ. Yé sọ vẹ̀ Jehovah nado whlẹn yé. Enẹwutu, Jehovah do angẹli de hlan dẹpẹ de he nọ yin Gideoni. Angẹli lọ dọna ẹn dọmọ: ‘Jehovah ko de we nado yin awhànfuntọ huhlọnnọ de.’ Gideoni kanse e dọ: ‘Nawẹ n’gán whlẹn Islaeli gbọn? N’ma pé nude go.’

Nawẹ Gideoni na wagbọn do yọnẹn dọ Jehovah ko de emi? E ze lẹngbọ-fún de do kọmẹ bo dọna Jehovah dọmọ: ‘To afọnnu, eyin n’mọdọ lẹngbọ-fún lọ kẹdẹ ji wẹ ahun ja do ṣigba bọ aigba hú lẹdo e pé, n’na yọnẹn dọ hiẹ jlo dọ yẹn ni whlẹn Islaeli.’ To wunkẹngbe, lẹngbọ-fún lọ yọ̀n taun bọ aigba ka hú! Ṣigba, Gideoni sọ biọ dọ to azán he na bọdego gbè, lẹngbọ-fún lọ ni hú na aigba ni yọ̀n. To whenue enẹ jọ godo, Gideoni wá kudeji dọ Jehovah ko de emi. Enẹwutu, e bẹ awhànfuntọ etọn lẹ pli nado hoavùn sọta Midianinu lẹ.

 Jehovah dọna Gideoni dọmọ: ‘N’na na awhàngbigba Islaelivi lẹ. Amọ́, na awhànfuntọ he a bẹpli lẹ ko sù gbau wutu, mì gán wá lẹndọ huhlọn mìtọn titi wẹ zọ́n bọ mì do gbawhàn. Dọna mẹdepope he to budi dọ ni lẹkọyi whé.’ Enẹwutu, awhànfuntọ 22 000 lẹkọyi whé bọ e pò omẹ 10 000. Enẹgodo, Jehovah dọmọ: ‘Awhànfuntọ lọ lẹ gbẹ́ sù gbau. Plan yé wá tọ̀sisa kọ̀n bo dọna yé dọ yé ni nùsin. Mẹhe to osin lọ nù bosọ to aṣeji nado ṣọ́ kẹntọ hadopo lọ lẹ kẹdẹ wẹ dona hodo we.’ Sunnu 300 kẹdẹ wẹ nọ aṣeji to whenue yé to osin nù. Jehovah dopà dọ sunnu sọha kleun ehelẹ wẹ na gbawhàn awhànfuntọ Midianinu 135 000 lọ lẹ tọn.

To ozán enẹ mẹ, Jehovah dọna Gideoni dọmọ: ‘Ojlẹ lọ die nado tọ́nawhàn Midianinu lẹ!’ Gideoni yí azò lẹ po ozẹ́n daho lẹ po na sunnu etọn lẹ, bọ zòwhán lẹ yin whiwhla do ozẹ́n lọ lẹ mẹ. E dọna yé dọmọ: ‘Mì pọ́n mi bo nọ basi kẹdẹdile yẹn to bibasi do.’ Gideoni kún azò etọn bo gbà ozẹ́n etọn, enẹgodo e ze zòwhán etọn daga bo dawhá dọmọ: ‘Ohí Jehovah tọn po Gideoni tọn po!’ Sunnu 300 etọn lẹpo sọ wà nudopolọ. Obu jẹ Midianinu lẹ ji bọ yé gbàdo bo doge-wezun mẹ. Yé biọ bẹwlu mẹ sọmọ bọ yé jẹ avùnho hẹ ode awetọ ji. Whladopo dogọ, Jehovah gọalọna Islaelivi lẹ nado gbawhàn kẹntọ yetọn lẹ tọn.