Saʼ xnumikebʼ ru li kutan, ebʼ laj Israel keʼxkanabʼ wiʼ chik li Jehobʼa ut keʼok xloqʼoninkil ebʼ li bʼalaqʼil yos. Chiru wuqubʼ chihabʼ, ebʼ laj Madian keʼrelqʼa ebʼ li xketomq ebʼ laj Israel ut keʼxsachk ebʼ li rawimq. Re xkolbʼal ribʼ chiruhebʼ, ebʼ laj Israel keʼxmuq ribʼ saʼebʼ li ochoch pek ut saʼebʼ li kʼicheʼ. Naq inkʼaʼ chik keʼxkuy, keʼxtzʼaama re li Jehobʼa naq teʼkoleʼq. Joʼkan naq li Jehobʼa kixtaqla jun li anjel chi xyeebʼal re jun li saaj winq aj Gedeon xkʼabʼaʼ: «Aʼ li Jehobʼa kisikʼok aawu re naq wanq aawankil re yalok». Laj Gedeon kixpatzʼ re: «Chanru tinkol li tenamit Israel wi maakʼaʼ inwankil?».

Laj Gedeon kiraj xnawbʼal chi tzʼaqal naq li Jehobʼa kisikʼok ru. Kʼaru kixbʼaanu? Kixhel jun peraas rix karneer chiru chʼochʼ ut kixye re li Jehobʼa: «Wi wulaj eqʼla li chuʼke naxtaqresi rix li karneer aʼin, abʼan chaqihaq ru li chʼochʼ, tinnaw naq laaʼat xatsikʼok wu re xkolbʼal li tenamit Israel». Wulajaq chik, li rix karneer jwal taqtaq, abʼan li chʼochʼ chaqi ru. Tojaʼ naq laj Gedeon kixtzʼaama re li Jehobʼa naq wulajaq wiʼ chik li rix karneer chaqihaq ru, abʼan li chʼochʼ taqtaqaq. Li kixpatzʼ laj Gedeon joʼkan xkʼulmank. Toj aran naq kichʼolaak chiru laj Gedeon naq li Jehobʼa kisikʼok ru. Joʼkan naq kixchʼutubʼebʼ laj puubʼ re xik chi yalok saʼ xbʼeenebʼ laj Madian.

 Li Jehobʼa kixye re laj Gedeon: «Tintenqʼahebʼ laj Israel chi qʼaxok u. Abʼan saʼ xkʼabʼaʼ naq naabʼalebʼ laj puubʼ wank rikʼinebʼ, maare teʼxkʼoxla naq maaʼani kitenqʼank rehebʼ. Ye rehebʼ laj puubʼ li yookebʼ xxiw naq teʼsutqʼiiq saʼ rochoch». Joʼkan naq 22.000 xkohebʼ, ut 10.000 keʼkanaak. Chirix chik aʼan li Jehobʼa kixye: «Toj naabʼalebʼ. Kʼamebʼ saʼ roqhaʼ ut taaye rehebʼ naq teʼukʼaq chaq haʼ. Teʼkanaaq aawikʼin kaʼajwiʼ li teʼrukʼ li haʼ ut qʼesaqebʼ ru chi ilok ma inkʼaʼ yook chaq chi chalk li xikʼ naʼilok». Kaʼajwiʼ 300 chi winq ajʼookebʼ ru naq yookebʼ chi ukʼaʼk haʼ. Li Jehobʼa kixye naq li chʼina chʼuut chi winq aʼin tixqʼaxebʼ ru li 135.000 aj puubʼ re Madian.

Saʼ ajwiʼ li qʼoqyink aʼan, li Jehobʼa kixye re laj Gedeon: «Anaqwan xhoonalil re xik chi yalok saʼ xbʼeenebʼ laj Madian». Laj Gedeon kixkʼe rehebʼ laj puubʼ ebʼ li xukubʼ ut ebʼ li kuk rikʼin xaml, ut kixye rehebʼ: «Ilomaqin ut teebʼaanu eere joʼ tinbʼaanu laaʼin». Laj Gedeon kixchʼeʼ li xukubʼ li wank rikʼin, kixjor li xkuk, kirekʼasi li xxaml saʼ xkaʼpakʼal ut kixjap re: «Li xjutzʼchʼiichʼ li Jehobʼa ut laj Gedeon!». Li 300 chi winq keʼxbʼaanu ajwiʼ aʼin. Ebʼ laj Madian jwal teʼxuwaq chaq ut yalaq bʼar nekeʼraanila ribʼ. Ut, saʼ xkʼabʼaʼ naq xeʼxchaʼchaʼi ribʼebʼ, xeʼok xrahobʼtesinkil ribʼ chiribʼilebʼ ribʼ. Jun sut wiʼ chik rikʼin aʼin, li Jehobʼa kixtenqʼa ebʼ laj Israel chi qʼaxok u saʼ xbʼeenebʼ li xikʼ nekeʼilok.