O ũrĩa mahinda maathiaga, Aisiraeli nĩ maatiganire na Jehova rĩngĩ na makĩambĩrĩria kũhoya ngai cia maheeni. Kwa ihinda rĩa mĩaka mũgwanja, Amidiani nĩ maaiyaga nyamũ cia kũrĩithia cia Aisiraeli na magathũkangia irio ciao. Nĩguo Aisiraeli matigatharĩkĩrũo nĩ Amidiani, maathiaga kwĩhitha ngurunga-inĩ na irĩma-inĩ. Nĩ maathaithire Jehova amahonokie, na nĩ ũndũ ũcio Jehova agĩtũma mũraika kũrĩ mũndũ wetagwo Gideoni. Mũraika ũcio aamwĩrire ũũ: ‘Jehova nĩ agũthurĩte nĩguo ũrũĩrĩre Aisiraeli.’ Gideoni akĩmũũria: ‘Ingĩhota atĩa kũhonokia Aisiraeli? Niĩ ndĩ mũndũ ũtarĩ kĩene.’

No Gideoni angĩamenyire atĩa atĩ Jehova nĩ aamũthurĩte? Aaigire gĩcunjĩ kĩa rũũa rwa ng’ondu nja na akĩra Jehova ũũ: ‘Rũciũ rũcinĩ akorũo gĩcunjĩ gĩkĩ kĩa rũũa gĩgaakorũo kĩrĩ kĩigũ nĩ ũndũ wa ime, na gũkũ nja guothe gũkorũo gwĩ kũũmũ, nĩ ngamenya atĩ nĩ ũrenda ngahonokie Aisiraeli.’ Mũthenya ũyũ ũngĩ rũcinĩ, gĩcunjĩ kĩu kĩa rũũa kĩarĩ kĩigũ, no nja guothe kwarĩ kũũmũ. No Gideoni nĩ aacokire akiuga atĩ nĩ ekwenda mũthenya ũyũ ũngĩ rũcinĩ gĩcunjĩ kĩu kĩa rũũa gĩkorũo kĩrĩ kĩũmũ, na kũu nja guothe gũkorũo kũrĩ kũigũ. Rĩrĩa ũndũ ũcio wahingire, Gideoni nĩ  aagĩire na ma biũ atĩ Jehova nĩ aamũthurĩte. Nĩ aacokanĩrĩirie thigari ciake nĩguo makarũe na Amidiani.

Jehova eerire Gideoni ũũ: ‘Nĩ ngũhootanĩra Aisiraeli. Na tondũ ũrĩ na thigari nyingĩ mũno, mũngĩhootana no mwĩcirie atĩ mwahootana na hinya wanyu. Meere atĩ mũndũ o wothe ũrĩ na guoya agĩrĩirũo nĩ kũinũka.’ Nĩ ũndũ ũcio thigari 22,000 nĩ ciacokire mũciĩ, gũgĩtigara thigari 10,000 tu. Ningĩ Jehova akiuga: ‘O na rĩu andũ acio no aingĩ mũno. Matware rũũĩ-inĩ na ũmeere manyue maĩ. Arĩa mekũnyua maĩ makĩĩhũgaga nĩ ũndũ wa thũ, no o tu ũgũtigwo nao.’ Andũ 300 tu no o maaikarire mehũgĩte makĩnyua maĩ. Jehova nĩ oigire atĩ andũ acio 300 nĩ mangĩahootire mbũtũ ya Amidiani ya thigari 135,000.

Ũtukũ ũcio Jehova nĩ eerire Gideoni ũũ: ‘Rĩrĩ nĩrĩo ihinda rĩa gũtharĩkĩra Amidiani!’ Gideoni aaneire thigari ciake coro na nyũngũ irĩ na imũrĩ thĩinĩ. Aaciĩrire ũũ: ‘Ndorai na mwĩke o ũrĩa ngwĩka.’ Gideoni nĩ aahuhire coro wake, akĩũraga nyũngũ, akĩhiũria kĩmũrĩ, na akĩanĩrĩra akiuga ũũ: ‘Nĩ rũhiũ rwa Jehova na rwa Gideoni!’ Nacio thigari ciake ciothe 300 igĩĩka o taguo. Amidiani nĩ maamakire mũno na makĩũra merekeire mĩena yothe. Nĩ ũndũ wa gũtukanĩrũo makĩambĩrĩria kũrũa o ene. O rĩngĩ Jehova nĩ aateithirie Aisiraeli kũhoota thũ ciao.