Ovaisrael ova li va efa po vali okulongela Jehova ndele tava hovele okulongela oikalunga. Oule womido heyali, Ovamidian ova kala tava vake po oimuna yOvaisrael nokuhanauna po oikunomwa yavo. Ovaisrael ova li hava hondama momakololo nomeemhunda opo vaha monike kOvamidian. Ova li va ilikana Jehova e va xupife. Jehova okwa li a tuma omweengeli waye komulumenhu omunyasha wedina Gideon. Omweengeli okwa ti: ‘Jehova okwe ku hoolola u ninge omukwaita omuladi.’ Gideon okwa li e mu pula a ti: ‘Ohandi dulu ngahelipi okuxupifa Israel? Ame omunhu wongaho.’

Mbela Gideon okwa li ta ka shiiva ngahelipi kutya Jehova oye e mu hoolola? Okwa li a tula olududi leedi moshipale ndele ta lombwele Jehova ta ti: ‘Ngeenge olududi ola kala la tuta komume ongula, ndele pedu opakukutu, ohandi ka shiiva kutya owa hala ndi xupife Israel.’ Ongula eshi kwa sha, olududi ola li la tuta, ofimbo pedu pa kukuta. Ashike Gideon okwa li a pula kutya mefiku tali landula, olududi nali kale la kukuta, ofimbo pedu pa tuta. Eshi osho sha ningwa, Gideon okwa li a tomhwa filufilu kutya Jehova okwe mu hoolola, ndele ta ongele ovakwaita vaye va ka lwife Ovamidian.

 Jehova okwa li a lombwela Gideon a ti: ‘Ohandi ka pa Ovaisrael efindano. Ashike molwaashi ou na ovakwaita vahapu neenghono, otashi dulika mu ka diladile kutya omwa findana moita kunye vene. Va lombwela kutya keshe oo a tila na shune keumbo.’ Opo nee ovakwaita 22 000 ova shuna keumbo, ndele ta pa fyaala 10 000. Jehova okwa ti vali: ‘Natango ovakwaita ovahapu unene. Va twala kokamulonga ndele to va lombwele va nwe. Ovo tava nu vo tava tale ngeenge otaku di ovatondi ovo ashike nava fyaale po.’ Ovakwaita 300 ovo aveke va li tava tale ofimbo tava nu. Jehova okwa li a udaneka kutya ovakwaita ovo vanini momuvalu otava ka finda ovakwaita Ovamidian ve li 135 000.

Jehova okwa li a lombwela Gideon oufiku oo a ti: ‘Indeni mu ka ponokele Ovamidian.’ Gideon okwa li a pa ovakwaita vaye omanghuma noiyuma ya kula mu na eenyika da holekwa. Okwe va lombwela a ti: ‘Taleni nge, ndele ningeni ngaashi handi ningi.’ Gideon okwa li a hovela okushika enghuma laye, ndele ta tatula oshiyuma, ta vikavika onyika, nokwiingida ta ti: ‘Eongamukonda olaJehova nolaGideon!’ Ovakwaita vaye aveshe 300 ova li va ninga ngaashi Gideon. Ovamidian ova li va tila ndele tava faduka po va ngwangwana va yuka keembinga adishe. Molwaashi ova li va lyalyakana, ova li va hovela okulwifafana. Natango, Jehova okwa li a kwafela Ovaisrael va finde ovatondi vavo.