Afta sɔm tɛm, di Izrɛlayt dɛn bin tɔn dɛn bak pan Jiova ɛn bigin fɔ wɔship lay lay gɔd dɛn bak. Fɔ sɛvin ia, di Midianayt dɛn bin de tif di Izrɛlayt dɛn animal dɛn ɛn pwɛl dɛn plant dɛn. Fɔ rɔnawe pan di Midianayt dɛn, di Izrɛlayt dɛn bin de ayd na kev ɛn mawntin dɛn. Dɛn beg Jiova fɔ sev dɛn. So Jiova sɛn wan enjɛl to wan yɔŋman we nem Gidyɔn. Di enjɛl se: ‘Jiova dɔn pik yu fɔ bi pawaful fɛtman.’ Gidyɔn aks am se: ‘Aw a go sev di Izrɛlayt dɛn? Mi na natin.’

Aw Gidyɔn go no se Jiova dɔn pik am? I bin put wan wul na grɔn ɛn tɛl Jiova se: ‘If na mɔnin di dyu mek di wul sok bɔt di grɔn dray, a go no se yu dɔn pik mi fɔ sev di Izrɛlayt dɛn.’ Di nɛks mɔnin, di wul bin dɔn rili sok ɛn di grɔn bin dray. Dɔn di ɔda mɔnin, Gidyɔn bin aks fɔ mek di wul dray ɛn di grɔn sok. We dat apin, Gidyɔn bin biliv tranga wan se Jiova dɔn pik am. I bin gɛda in sojaman dɛn fɔ go fɛt di Midianayt dɛn.

Jiova bin tɛl Gidyɔn se: ‘A go mek di Izrɛlayt dɛn win. Bɔt bikɔs yu gɛt bɔku sojaman dɛn, sɔntɛm  yu go tink se yu win di wɔ bay yusɛf. Tɛl ɛnibɔdi we de fred fɔ mek i go bak na os.’ So 22,000 sojaman dɛn bin go bak na os, ɛn na 10,000 sojaman dɛn bin lɛf. Dɔn Jiova tɛl am se: ‘Di sojaman dɛn stil bɔku. Kam wit di sojaman dɛn na di watasay ɛn tɛl dɛn fɔ drink di wata. Tek di wan dɛn nɔmɔ we de wach fɔ dɛn ɛnimi dɛn we dɛn de drink.’ Na 300 man dɛn nɔmɔ bin de wach fɔ dɛn ɛnimi dɛn we dɛn bin de drink. Jiova prɔmis se na dɛn smɔl sojaman dɛn nɔmɔ i go yuz fɔ win di 135,000 Midianayt sojaman dɛn.

Da nɛt de, Jiova tɛl Gidyɔn se: ‘Na naw na di tɛm fɔ atak di Midianayt dɛn!’ Gidyɔn bin gi in man dɛn ɔn dɛn ɛn big kɔntri pɔt dɛn usay dɛn bin ayd stik dɛn we gɛt faya pan dɛn. I bin tɛl dɛn se: ‘Una wach mi, ɛn una du di sem tin we a de du.’ So Gidyɔn bin blo in ɔn, brok in kɔntri pɔt, shek shek di stik we gɛt faya pan am ɔp, ɛn ala se: ‘Jiova in sɔd ɛn Gidyɔn in sɔd!’ Ɔl in 300 sojaman dɛn bin du di sem tin. Di Midianayt dɛn bin rili fred, ɛn dɛn bin de rɔnawe go difrɛn say dɛn. We dɛn bin de rɔn rɔn, dɛn bigin fɔ atak dɛnsɛf. Dis tɛm bak, Jiova bin ɛp di Izrɛlayt dɛn fɔ win dɛn ɛnimi dɛn.