တၢ်မၤလိ ၃၄
စီၤကံးဒဧိၣ်ဒုးနၢၤဝဲ ပှၤမံးဒယၣ်ဖိတဖၣ်
လၢခံ ပှၤအံၣ်စရ့လးဖိတဖၣ် တဘူၣ်ထီၣ်ဘါထီၣ်ယဟိဝၤယွၤလၢၤဘၣ်. အဝဲသ့ၣ်ဘူၣ်ထီၣ်ဘါထီၣ်က့ၤ ယွၤလၢအကမၣ်တဖၣ်လီၤ. အဃိ လၢနွံနံၣ်အတီၢ်ပူၤန့ၣ် ပှၤမံးဒယၣ်ဖိဟုၣ်ဝဲ ပှၤအံၣ်စရ့လးဖိ အဆၣ်ဖိကီၢ်ဖိတဖၣ် ဒီးမၤဟးဂီၤကွံာ် အဝဲသ့ၣ်အတၢ်လီၢ်လၢ ကသူၣ်အီၣ်ဖျးအီၣ်တၢ်အဂီၢ်လီၤ. ဒ်သိး ပှၤအံၣ်စရ့လးဖိတဖၣ် ကပူၤဖျဲးလၢပှၤမံးဒယၣ်ဖိ အစုပူၤအဂီၢ် အဝဲသ့ၣ်ဘၣ်လဲၤအိၣ်ခူသူၣ်လၢ ကစၢၢ်ဒီးလ့ကအိအပူၤလီၤ. ဒီးပှၤအံၣ်စရ့လးဖိတဖၣ် ဃ့ကညးယဟိဝၤယွၤလၢ ကမၤစၢၤအဝဲသ့ၣ်လီၤ. အဃိ ယဟိဝၤယွၤဆှၢလီၤအမူခိၣ်ကလူးလၢ ပှၤသးစၢ်တဂၤလၢ အမံၤမ့ၢ်စီၤကံးဒဧိၣ်အအိၣ်လီၤ. မူခိၣ်ကလူးတဲဘၣ်စီၤကံးဒဧိၣ်လၢ– ‘ယဟိဝၤယွၤဃုထၢထီၣ်နၤ ဒ်သိးနကကဲထီၣ်သုးဖိလၢ အဂံၢ်ဆူၣ်တဂၤလီၤ.’ စီၤကံးဒဧိၣ်တဲဆၢက့ၤအီၤလၢ– ‘ယတမ့ၢ်တၢ်နီတမံၤဘၣ်အဃိ ယမၤပူၤဖျဲး ပှၤအံၣ်စရ့လးဖိကသ့ဒ်လဲၣ်.’
ယဟိဝၤယွၤဃုထၢထီၣ် စီၤကံးဒဧိၣ်အနီၢ်ကီၢ်န့ၣ် စီၤကံးဒဧိၣ်ကသ့ၣ်ညါဝဲဒ်လဲၣ်. စီၤကံးဒဧိၣ်ပာ်လီၤသိဆူၣ်လၢ ဟီၣ်ခိၣ်လိၤ ဒီးအဝဲတဲဘၣ်ယဟိဝၤယွၤလၢ– ‘ဖဲဂီၤခီအဆၢကတီၢ်န့ၣ် ဟီၣ်ခိၣ်မ့ၢ်ဃ့ထီ ဘၣ်ဆၣ်သိဆူၣ်အံၤမ့ၢ်ဘၣ်စီၣ်လၢ ပစီၤထံန့ၣ် ယနာ်လၢနဃုထၢထီၣ်ယၤလၢ ယကမၤပူၤဖျဲးပှၤအံၣ်စရ့လးဖိတဖၣ်လီၤ.’ လၢခံတဂီၤန့ၣ် စီၤကံးဒဧိၣ်ထံၣ်ဘၣ်ဝဲလၢ သိဆူၣ်ဘၣ်စီၣ်ဝဲ, မ့မ့ၢ်ဟီၣ်ခိၣ်န့ၣ်ဃ့ထီဝဲလီၤ. ဘၣ်ဆၣ် စီၤကံးဒဧိၣ်ဃ့ယဟိဝၤယွၤ လၢအသီတဘျီလၢ သိဆူၣ်ကဘၣ်ဃ့ထီ ဒီးဟီၣ်ခိၣ်န့ၣ် ကဘၣ်ဘၣ်စီၣ်ဝဲလီၤ. ဖဲတၢ်မၤအသးဒ်န့ၣ်အခါ စီၤကံးဒဧိၣ်နာ်ဝဲလၢ ယဟိဝၤယွၤဃုထၢထီၣ်အီၤနီၢ်ကီၢ်လီၤ. ဒီးစီၤကံးဒဧိၣ် ပာ်ဖှိၣ်ထီၣ်အပှၤသုးဖိတဖၣ် ဒ်သိးကလဲၤဒုးဝဲ ပှၤမံးဒယၣ်ဖိတဖၣ်အဂီၢ်လီၤ.
ယဟိဝၤယွၤတဲဘၣ်စီၤကံးဒဧိၣ်လၢ– ‘ဒ်သိးပှၤအံၣ်စရ့လးဖိတဖၣ် ကမၤနၢၤတၢ်အဂီၢ် ယကမၤစၢၤအဝဲသ့ၣ်လီၤ. ဘၣ်ဆၣ် ခီဖျိလၢအဝဲသ့ၣ် အနီၣ်ဂံၢ်အိၣ်အါအဃိ ဘၣ်သ့ၣ်သ့ၣ် သုကဆိကမိၣ်လၢ သုမၤနၢၤတၢ်လၢ သုနီၢ်ကစၢ်အဂံၢ်အဘါလီၤ. အဃိ တဲဘၣ်အဝဲသ့ၣ်လၢ ပှၤလၢအပျံၤတၢ်န့ၣ် က့ၤလၢသုဟံၣ်တက့ၢ်.’ ပှၤသုးဖိအဂၤ ၂၂,၀၀၀ န့ၣ် က့ၤဝဲလၢအဟံၣ်လီၤ. မ့မ့ၢ်ပှၤလၢအအိၣ်တ့ၢ်န့ၣ် အိၣ်ဒံးဝဲအဂၤ ၁၀,၀၀၀ လီၤ. ဒီးယဟိဝၤယွၤတဲဘၣ် စီၤကံးဒဧိၣ်လၢ– ‘ပှၤသုးဖိတဖၣ်န့ၣ် အနီၣ်ဂံၢ်အိၣ်အါဒံး, မၢပှၤသုးဖိတဖၣ်လဲၤလီၤလၢ ထံကျိပူၤဒီးမၢအဝဲသ့ၣ်အီထံတက့ၢ်. ပှၤလၢအအိၣ်ဒီးတၢ်ပလီၢ်အသး ဖဲအအီထံအခါန့ၣ် ဃုထၢထီၣ်အီၤတက့ၢ်.’ ဒီးပှၤလၢအအီထံလၢအစု ဒီးပလီၢ် အသးတဖၣ်န့ၣ် အနီၣ်ဂံၢ်အိၣ်ထဲ ၃၀၀ လီၤ. ယဟိဝၤယွၤအၢၣ်လီၤဝဲလၢ ပှၤသုးဖိအဂၤ ၃၀၀ အံၤကဒုးနၢၤဝဲပှၤမံးဒယၣ်အသုးဖိအဂၤ ၁၃၅,၀၀၀ န့ၣ်လီၤ.
ဖဲနၤအဝဲန့ၣ် ယဟိဝၤယွၤတဲဘၣ်စီၤကံးဒဧိၣ်လၢ– ‘ခဲအံၤအဆၢကတီၢ်ဘၣ်လၢ သုကဘၣ်ဒုးပှၤမံးဒယၣ်ဖိတဖၣ်လံ.’ စီၤကံးဒဧိၣ်ဟ့ၣ်လီၤဝဲ အသုးဖိတဖၣ်လၢကွဲၤ, မ့ၣ်အူအတၢၣ်ဒီးပာ်ခူသူၣ်ဝဲ မ့ၣ်အူအတၢၣ်လၢသပၢၤဟီၣ်ခိၣ်အပူၤလီၤ. စီၤကံးဒဧိၣ်တဲဘၣ်အဝဲသ့ၣ်လၢ– ‘ကွၢ်ယၤဒီး မၤပိာ်ထွဲယခံတက့ၢ်.’ စီၤကံးဒဧိၣ်အူထီၣ်အကွဲၤ, မၤသ့ၣ်ဖးအသပၢၤ, ဝံၢ်ဝၢ်အမ့ၣ်အူတၢၣ် ဒီးကိးပသူထီၣ်လၢ– ‘ယဟိဝၤယွၤဒီး စီၤကံးဒဧိၣ်အနးတဘ့ၣ်.’ ပှၤသုးဖိအဂၤ ၃၀၀ အံၤ မၤဝဲဒ်စီၤကံးဒဧိၣ်အသိးလီၤ. ဝံၤဒီး ပှၤမံးဒယၣ်ဖိတဖၣ်ပျံၤတၢ် ဒီးဃ့ၢ်ကွံာ်ဝဲတဂၤတပူၤတဂၤတပူၤလီၤ. မ့ၢ်လၢတၢ်သဘံၣ်သဘုၣ် အိၣ်ထီၣ်ဝဲအဃိ ပှၤမံးဒယၣ်ဖိတဖၣ် ဒုးလိာ်က့ၤအသးကဒဲကဒဲလီၤ. တဘျီအံၤစ့ၢ်ကီး ယဟိဝၤယွၤမၤစၢၤ ပှၤအံၣ်စရ့လးဖိတဖၣ်ဒ်သိး ကဒုးနၢၤဝဲအဒုၣ်အဒါအဂီၢ်လီၤ.
“ဒ်သိး အစိအကမီၤ ဒိၣ်ကဲၣ်ဆိးအံၤ, ကဘၣ်ဃးဒီးယွၤ, ဒီးတမ့ၢ်ဘၣ်ပှၤဘၣ်လီၤ.”—၂ ကရံၣ်သူး ၄:၇