Kuna kwalanda, Aneyisaele bakolamena diaka Yave yo yantika sambila nzambi zaluvunu. Mu mvu nsambwadi, esi Midiani bayiyanga e bulu ya Aneyisaele yo fwasa e mbongo a mpatu zau. Muna tina esi Midiani, Aneyisaele baswekamanga muna nduka ye miongo. Basamba kwa Yave kimana kabatanina. Muna kuma kiaki, Yave watwika mbasi kwa toko dimosi wakala ye nkumbu a Ngidone. O mbasi wamvovesa vo: ‘Yave usolele kimana wakala kesa dia vita.’ Ngidone wayuvula vo: ‘Aweyi ndenda vuluzila Isaele? I mpasi muntu kwame.’

Aweyi Ngidone kadi zayila vo Yave yandi kikilu kasola? Wasia wika wa meme vana ntoto yo vova kwa Yave vo: ‘Avo muna mene o wika uyondalele ye dime, kansi o ntoto wayuma, izaya vo ngeye unsolele kimana yavuluza Isaele.’ Muna mene, wawana vo wika wayondalala ye dime, kansi o ntoto wayuma. I bosi, Ngidone walomba vo muna mene ulanda, o wika wakala wayuma, kansi o ntoto wayondalala ye dime. Vava kamona vo e diambu kalomba divangamene, Ngidone  wakwikila vo Yave yandi kikilu kasola. Wakutakesa makesa mandi mu kwenda nuana ye esi Midiani.

Yave wavovesa Ngidone vo: ‘Isundisa Aneyisaele. Kansi, wau vo makesa mayingi una mau, nulenda yindula vo mu ngolo za yeno kibeni nusundidi e vita. Zayisa kwa konso kesa una yo wonga kavutuka kuna nzo andi.’ Muna kuma kiaki, makesa 22.000 bavutuka kuna nzo zau, makesa 10.000 kaka basala. Yave umvovese diaka vo: ‘Wakinu ye makesa mayingi. Ubanata kuna nkoko yo kubavovesa vo banua e maza. Sola kaka ana betalanga e mbeni ekolo benuanga e maza.’ Makesa 300 kaka bakala balungalala ekolo banuanga e maza. Yave wasia nsilu vo makesa mama yau besunda 135.000 ma makesa ma Midiani.

Muna fuku, Yave wavovesa Ngidone vo: ‘E ntangwa ifwene ya nuanisa Midiani.’ Ngidone wavana makesa mandi e mpungi ye mvungu mina basweka e mini. Wabavovesa vo: ‘Nuntala, nuvanga konso una ivanga.’ Ngidone wasika e mpungi, wawula o mvungu yo simba e mini vana koko, okazadi vo: ‘Nsosolo a Yave yo Ngidone!’ Makesa 300 bakala yandi bavangidi diau dimosi. Makesa ma Midiani babakama kwa wonga yo muangana. Bayantika vondana. Mu nkumbu wau mpe, Yave wasadisa Aneyisaele kimana basunda e mbeni zau.