Hamulaho wa nako, Isilaele hape afetuhela Jehova ni kukala kusebeleza milimu ya buhata. Ka lilimo ze 7, Mamidiani nebauzwize limunanu za Maisilaele ni kusinya licalo zabona. Maisilaele nebaipatanga mwa mikoti ya macwe ni mwa malundu kuli basike babulaiwa ki Mamidiani. Bakupa Jehova kuli abatuse. Kacwalo, Jehova aluma lingeloi ku mutangana yabizwa Gidioni. Lingeloi lali ku Gidioni: ‘Jehova uketile wena kuba ndwalume yamaata.’ Gidioni abuza kuli: ‘Nikalamulela cwañi Isilaele? Hani sesiñwi.’

Gidioni naaka ikolwisa cwañi kuli Jehova naamuketile? Abeya boya bwa ngu fafasi mi ali ku Jehova: ‘Habusa kakusasana, haiba boya bukakolobiswa ki puka kono mubu inze uomile, nikaziba kuli uniketile kuli nilukulule Isilaele.’ Habusa kakusasana, boya nebukolobile mi mubu neuomile! Kono Gidioni akupa Jehova kuli habusa kakusasana boya buome kono mubu ukolobe. Taba yeo hane iezahalile, Gidioni aikolwisa kuli Jehova naamuketile. Aonga-onga masole bahae kuyo lwanisa Mamidiani.

 Jehova kihaa li ku Gidioni: ‘Nikatusa Maisilaele kutula mwa ndwa. Kono bakeñisa kuli unani masole babañata hahulu, ukaswana uikutwa kuli ki wena yaatuzi ndwa. Utaluseze mutu kaufela yanaanani sabo kuli akute kwahae.’ Kacwalo, masole ba 22,000 bakuta mi kwasiyala ba 10,000. Cwale Jehova kihaa li: ‘Masole basali babañata hahulu. Ubaise kwa kanukana, mi ubataluseze kuli banwe mezi. Usiyale feela ni babaka nwa mezi inze baisa pilu kwa sila.’ Neli feela masole ba 300 bane banwa mezi inze baisa pilu kwa sila. Jehova naasepisize kuli baana bapalo yenyinyani nebaka tula masole ba Mamidiani ba 135,000.

Mwahalaa busihu bo, Jehova kihaa li ku Gidioni: ‘Ye ki yona nako yakutaseza Mamidiani!’ Gidioni afa masole bahae manaka ni lipizana zetuna zenani mamonyi mwahali. Kihaa li ku bona: ‘Munitalimele mi munilikanyise ka tokomelo.’ Gidioni aliza lunaka lwahae, atuba pizana yahae, ni kumonyeha lumonyi mi kihona ahuwa kuli: ‘Mukwale wa Jehova ni wa Gidioni!’ Masole bahae kaufela ba 300 baeza sina mwanaa babulelezi. Mamidiani nebasabile hahulu mi basabela mwa libaka zeshutana-shutana. Bakeñisa taba yeo, bakala kuitwanisa. Jehova hape atusa Maisilaele kutula lila zabona sina mwanaaezezanga kwamulaho.