Mwenda mafuku, Isalela wāvundamine monka Yehova katōta baleza ba bubela. Mu bula bwa myaka isamba-ibidi, bene Midyana bādi beba banyema ba bene Isalela, ne kwibonakenya byangulwa byabo. Pa kwipandija ku bene Midyana, bene Isalela bādi bakafyama mu mitá ne mu ngulu. Bene Isalela bāzenzele Yehova ebapandije. Ebiya Yehova wātuma mwikeulu kudi nsongwalume umo witwa bu Ngideoni. Uno mwikeulu wāmusapwidile amba: ‘Yehova wakutonge wikale wa bulwi mukomokomo.’ Ngideoni wāipangula’mba: ‘Le nkapandija Isalela namani? Ami ne wa bituputupu.’

Le Ngideoni wādi wa kuyuka namani amba Yehova i mumutonge? Wātūdile kiseba panshi, wānena Yehova amba: ‘Shi lubanga kiseba kikale kibombe na lumé inoko nshi ikale myūmu, nsa kuyuka’mba usakanga mpandije Isalela.’ Lubanga lwālondele’po, kiseba kyādi kibombe bininge, nshi papo myūmu tē! Inoko ne pano pene Ngideoni wālombele amba lubanga lukwabo kiseba kikale kyūmu tē, nshi nayo ikale mibombe. Abyo pa kulongeka, Ngideoni wāfula ku kuyuka’ma Yehova i mumutonge. Wābunga pamo bandi basola mwanda wa kukalwa na bene Midyana.

 Yehova wāsapwidile Ngideoni amba: ‘Nsa kupa bene Isalela bushindañani. Inoko byodi na basola bavule bininge, mubwanya kulanga’mba mubanekenya divita banwe bene. Lombola sola ense wa moyo ajokele kwandi.’ Penepo kwājoka basola 22 000, kwāshala basola 10 000. Kupwa, Yehova wānena’mba: ‘basola bakidi bangi bininge. Wibaselele ku kamunonga, wibanene batome mema. Shala’nka na boba batoma koku batalakanya mwanda wa balwana.’ Enka bana-balume 300 kete bo bāshele badyumuke pobādi batoma mema. Yehova wālaa’mba, bano bana-balume batyetye bakanekenya basola 135 000 bene Midyana.

Mu bwine bufuku’bwa, Yehova wāsapwila Ngideoni amba: ‘Pano kitatyi kibabwana kya kutamba bene Midyana divita!’ Ngideoni wāpa bantu bandi masengo ne milondo mikatampe mufye byenge. Wēbasapwila’mba: ‘Ntalei ne kulonga enka monongela.’ Ngideoni wāila lusengo lwandi, wālala mulondo wandi, wāpēpeja kyenge kyandi, ne kutūta kyungwe amba: ‘Kipete kya Yehova ne kya Ngideoni!’ Bantu bandi bonso 300 nabo bālongela monka. Bene Midyana pa kukwatwa moyo bininge, bānyemena mu ntanda ku mitamba yonso. Byobādi mu kavutakanya, baanza kwilwa divita abo bene na bene. Pano kadi, Yehova wākweshe monka bene Isalela banekenye balwana nabo.