Chimwahitili mpinji, aIsarela alekeli kudifukula kudi Yehova nawa atachikili kudifukula kudi anzambi akutwamba. Hadi yaaka 7, aMidiyani eyileña yimuna yawaIsarela nikuyikisañena mbutu. Hakwila apuluki kudi aMidiyani, aIsarela aswamineña mumayeñu nimumapidi. Alembeli kudi Yehova nawu ayamwini. Dichi Yehova watemesheli kañelu kudi mukwenzi wejina daGidiyoni. Kañelu wahosheli nindi: ‘Yehova nakutondi kulonda wiikali mushidika wañovu.’ Gidiyoni wehwili nindi: ‘Indi ami nukutwesha ñahi kwamwina aIsarela? Ami nashikilimu wanyi.’

Gidiyoni wadi kwiluka ñahi nindi anamutondi kudi Yehova? Washili mavuji amukoku heseki nawa wamulejeli Yehova nindi: ‘Nantetemena neyi mavuji akazowa nawuumi ilaña heseki hakekali hooma, nakeluka nami wunakukeña neyi nakamwini aIsarela.’ Hefuku dalondelelihu nantetemena mavuji amukoku azoweli ilaña heseki hadiña hooma! Ilaña Gidiyoni walombeli cheñi nindi ifuku dikwawu dakalondelahu nantetemena mavuji amukoku akekali oma ilaña heseki hakazowi. Chumichi chichamwekeni, Gidiyoni wakuhweleleli chikupu nindi Yehova namutondi. Wapompesheli amashidika indi kulonda azuñi nawaMidiyani.

 Yehova wamulejeli Gidiyoni nindi: ‘Nakayikwasha aIsarela akashindi. Ilaña chineli wudi namashidika amavulu nankashi, keña mwakatachiki kutoñojoka nenu munashindi njita nañovu jenu. Lejaku muntu wejima wunatiyi woma neyi yafunti kwitala.’ Dichi antu 22,000 afuntili kumatala nawa adi 10,000 hohu diwu ashalili. Kuhiñahu Yehova wamulejeli nindi: ‘Amashidika achidi amavulu nankashi. Yitwali kukaloña nawa wuyileji anwi menji. Wushali hohu nanowu akunwaña menji iku anakutalatala neyi kunakwinza ayilumbu.’ Amayala 300 hohu diwu anwineña menji iku anakutalatala. Yehova wamulejeli nindi awa amayala antesha diwu akushinda amashidika 135,000 awaMidiyani.

Hawowenowu wufuku, Yehova wamulejeli Gidiyoni nindi: ‘Ayinu diyi mpinji yakulukuka aMidiyani!’ Gidiyoni wayinkeli antu jindi nseñu ninsaba jamaneni mwaswekeliwu yimunyi. Wayilejeli nindi: ‘Muntaleña nawa mwileña mwejima munukwilaña.’ Gidiyoni wavumishili nseñu yindi, wafumpili nsaba yindi, wanyamwini chimunyi chindi nawa wabidikili nindi: ‘Mpoku yakabali yaYehova nawa yaGidiyoni!’ Amayala ejima 300 adiñayi nawu niwena elili mwomumu. AMidiyani atiyili woma nawa atemukilili kutubadi twashiyashana. Muloña wakuluwankana, atachikili kuditapa mulwawu. Yehova wayikwashili cheñi aIsarela kushinda ayilumbu jawu.