Mosmos, Jo-Israel nochako oweyo Jehova, mi gichako lamo nyiseche manono. Kuom higni abiriyo, Jo-Midian ne kwalo jamni mag Jo-Israel kendo ketho puothegi. Mondo Jo-Midian kik hinygi, Jo-Israel ne pondoga e lwendni kod e wi gode. Ne gisayo Jehova mondo oresgi. Jehova ne owinjo kwayogi, kendo ne ooro malaikane ir dichwo moro ma niluongo ni Gidion. Malaikano nonyiso Gidion ni: ‘Jehova oseyieri mondo ibed jalweny ma biro reso Jo-Israel.’ Gidion nopenjo kama: ‘An dares Jo-Israel nade? An ng’ama nono malich.’

Ere kaka Gidion ne dhi ng’eyo ni Jehova noseyiere mondo ores joge? Ne okawo yier rombo kae to oketo e lowo, mi onyiso Jehova niya: ‘Ka kiny gokinyi ayudo ka yierni otimo pi to lowo to otwo, abiro ng’eyo ni idwaro tiyo koda e reso Jo-Israel.’ Kinyne noyudo ka yierno otimo pi to lowo to ne otwo! Kae to Gidion ne okwayo Jehova mondo yierno e ma kinyne obed motwo to lowo obed mang’ich. Ka ne mano otimore, Gidion koro ne obedo gadier chuth ni Jehova ne oseyiere mondo ores Jo-Israel. Ne ochoko jolweny mondo giked gi Jo-Midian.

 Jehova nonyiso Gidion kama: ‘Abiro miyo Jo-Israel olo jowasikgi. Kata kamano, nikech in gi jolweny mang’eny, unyalo po kuparo ni un e muloyo lwenyno. Nyis ng’ato ang’ata ma luor mondo odog dala.’ Jolweny 22,000 ne odok dala, kendo 10,000 kende e ma nodong’. Kae to Jehova nowachone kama: ‘Jolwenygi pod ng’eny ahinya. Tergi e dho aora kae to inyisgi gimodh pi. Joma omodho ka otang’ ne jowasigu e ma idong’go.’ Mana chwo 300 kende e ma ne omodho pi ka otang’. Jehova ne osingo ne Gidion ni jolweny matin-go ne dhi loyo jolweny 135,000 mag Midian.

Ka ne piny oselil, Jehova ne onyiso Gidion kama: ‘Sa koro osechopo mar monjo Jo-Midian!’ Gidion ne omiyo jalweny ka jalweny tung’ gi agulu ma nigi mach e iye. Nonyiso jolwenygo kama: ‘Neuru kaka atimo, kae to un be utim kamano.’ Gidion nogoyo tung’, notoyo agulu, kendo ne ofwayo mach ma ne en-go ka okok niya: ‘Ligangla mar Jehova kod mar Gidion!’ Ji 300 ma ne ni kodego bende ne otimo kamano. Luoro nomako Jo-Midian ahinya, kendo ne gichako ringo koni gi koni. Chochnino ne omiyo gichako monjore e kindgi giwegi. Jehova ne okonyo Jo-Israel loyo jowasikgi kendo.