Lino papisile insita, Aina Izlaeli yatiile ukupepa Yeova nupya, iyatandika nu ukupepa ya leza yaufi. Pa myaka 7, Aina Midyani iiyanga ivitekwa vya Aina Izlaeli nu kuyononela ivilimwa. Pakuti Aina Izlaeli yapusuke uku Ina Midyani, yafisamanga umu viwina ivyali umu mawe nu mu myamba. Yapaapasile ukuti Yeova ayapususye. Fwandi Yeova watumile malaika uku mulumendo uwi zina ilyakuti Gidyoni. Lyene malaika walanzile ati: ‘Yeova atakusoolola ukuya umusilika uwamaka.’ Gidyoni nawe uzizye ati: ‘Uzye ningapususya uli Aina Izlaeli? Nemo neene uwa sile sile.’

Uzye Gidyoni wali nu kumanya uli ukuti Yeova aatamusoolola? Wisile mavumbu pansi nu kuneena Yeova ati: ‘Mutondo katondo nga naca nazana ukuti mavumbu atipate, lelo umusili wene uume, ndamanya ukuti watunsoolola ukuti nkapususye Aina Izlaeli.’ Uwanda uwalondelilepo akatondo mavumbu yaali atipate lelo umusili wene wali uume. Nomba Gidyoni walenzile ukuti pa wanda walondelelapo pene, mavumbu aliyo yaye aume lelo musili uye utipate. Lino vii vyacitike, Gidyoni wasininkizye ukuti Yeova watamusoolola. Fwandi wakolonganike asilika pakuti yakalwisye Aina Midyani.

 Yeova wanenyile Gidyoni ati: ‘Ndalenga ukuti Aina Izlaeli yacimvye. Nomba pa mulandu wakuti watukwata asilika aingi, limwi ulaelenganya ukuti watucimvya ukumaka yako sile. Neena yonsi aakuvwa intete ukuti yaswilile ukumwao.’ Fwandi asilika 22,000 yaswilile ukumwao nupya kwasile sile asilika 10,000. Lyene Yeova watiile: ‘Asilika yacili aingi. Uyatwale ukuluzi nu kuyanena ukuti yamwe amanzi. Usyale sile na asilika aamamwa amanzi ala yakulola kuno aalwani yakwiza.’ Asilika 300, aliyo sile yamwile manzi alayakulola ndi cakuti aalwani yakwiza. Fwandi Yeova walavile ukuti asilika yakwene anono aliyo yalacimvya asilika 135,000 Aina Midyani .

Uwanda kwene uwa usiku, Yeova wanenyile Gidyoni ati: ‘Ii insita iyakuzanza Aina Midyani!’ Gidyoni wapeezile aonsi mapenga ni mbale umwali ni nkozyo izyakanga. Wayanenyile ati: ‘Mulole vino nimacita nupya namwe kwene avino mucite.’ Gidyoni walizizye ipenga, atamola imbale, akatusya nu lukozyo umupela alino apunda ukuti: ‘Lupanga lwakwe Yeova na lwakwe Gidyoni!’ Aonsi yonsi 300 yano wali nayo yacisile vivyo kwene. Aina Midyani yuvwile intete nu kutandika ukusimula umu ntunga izipusanepusane. Nupya yavulunganyiziwe icakuti yaatandike ukukomana. Nupya kwene Yeova wazwilizye Aina Izlaeli ukucimvya alwani yao.