Israyɛll nebã wa n basa a Zeova n pʋʋsd bõn-naandse. Madiyã nebã ra wat n zuuda b rũmsã la b sãamd b koodã. Kaoosa yʋʋm a yopoe. Israyɛll nebã ra kẽeda tãms bogdẽ n solgdẽ, sẽn na yɩl tɩ Madiyã nebã ra paam-b ye. B kosa a Zeova t’a fãag-ba. A Zeova tʋma malɛk rao a ye nengẽ. Rao wã yʋʋr la a Zedeyõ. Malɛkã yeel-a lame yaa: ‘A Zeova yãka foo tɩ f na n yɩ sodaag sẽn tar pãnga.’ La a Zedeyõ sok-a lame yaa: ‘M na n maana wãn n fãag Israyɛll nebã? Mam pa tõe baa fʋɩ.’

Bõe la a Zedeyõ maan n bãng t’a Zeova sɩd yãka yẽ? A yɛdga pe-kõbd tẽnga, n yeel a Zeova yaa: ‘Beoog yibeoogo, m sã n yã tɩ meenemã madga pe-kõbdã tɩ tẽngã yaool n yaa koɛɛnga, mam na n bãngame tɩ fo sɩd yãka maam tɩ m fãag Israyɛll nebã.’ Beoogã sẽn vẽege, pe-kõbdã madgame tɩ tẽngã yaa koɛɛnga. A Zedeyõ leb n kosa a Zeova t’a kɩt tɩ tẽngã madg tɩ pe-kõbdã ra madg ye. Sɩd yɩɩ woto. Rẽ, a bãngame tɩ yaa yẽ la a Zeova yãk-yã. A tigma sodaas tɩ b na n tɩ zab ne Madiyã nebã.

 A Zeova yeela a Zedeyõ yaa: ‘Mam na n kɩtame tɩ Israyɛll nebã tõog zabrã. La fo sodaasã sẽn yaa wʋsgã, fo tõe n wa tagsdame tɩ yaa ne f mengã pãng la f tõog zabrã. Yeel sodaasã tɩ ned ning sẽn yɛɛsd lebg n kuili.’ Neb 22 000 n lebg n kuili, tɩ kell sodaas 10000. La a Zeova yeelame: ‘Sodaasã ket n yaa wʋsgo. Tall-b n kẽng kʋɩlgẽ wã, la f yeel-b tɩ b yũ koomã. Neb nins sẽn na n kaad koomã ne b nug n yũud la b get bɛɛbã sã n pa watã, yaa bãmb bal n na n kẽng zabrã.’ Neb 300 bal n da kaad koomã n yũuda. A Zeova yeelame tɩ b na n tõoga Madiyã sodaasã sõor sẽn yaa 135 000 wã.

Baraar yʋngo, a Zeova yeela a Zedeyõ yaa: ‘Yik masã n tɩ zab ne Madiyã nebã.’ A Zedeyõ kõo a sodaag fãa baorg ne rʋg-vɩʋʋgo, tɩ raoog sẽn wit bugum sag rʋkã pʋgẽ. Rẽ poore a yeel-b lame yaa: ‘Maan-y wa mam sẽn na n maanã.’ A Zedeyõ peeba baorgã, n wãag a rʋkã, la a zẽk a bugmã n yeel yaa: ‘A Zeova ne a Zedeyõ sʋʋga.’ Sodaas 300 wã fãa maana woto. Madiyã nebã yɛɛsame, tɩ ned fãa zoet n teesd a sẽn paamẽ. B sẽn yɛɛsã, b wẽneg n kɛ taab ne b sʋʋsã. So-kãngã yɛsa, a Zeova sõnga Israyɛll nebã tɩ b tõog b bɛɛbã.