LEZZJONI 34
Gidegħon rebaħ lill-Midjanin
Maż-żmien, l-Iżraelin reġgħu telqu lil Ġeħova u bdew iqimu lill-allat foloz. Għal sebaʼ snin, il-Midjanin serqu l-annimali tal-Iżraelin u qerdulhom il-ħxejjex li kienu jiżirgħu. Biex jaħarbu mill-Midjanin, l-Iżraelin staħbew fl-għerien u fil-muntanji. Huma talbu lil Ġeħova biex jgħinhom. Għalhekk, Ġeħova bagħat anġlu għand żagħżugħ jismu Gidegħon. L-anġlu qallu: ‘Ġeħova għażel lilek biex tkun gwerrier setgħan.’ Gidegħon staqsieh: ‘Kif nistaʼ jien insalva lil Iżrael? Jien m’jien xejn.’
Gidegħon kif kien se jkun jaf li Ġeħova kien għażel lilu? Hu qabad biċċa ġilda bis-suf u għamilha mal-art u qal lil Ġeħova: ‘Jekk filgħodu s-suf ikun imxarrab bin-nida imma l-art tkun niexfa, jien inkun naf li int tridni nsalva lil Iżrael.’ L-għada filgħodu, is-suf kien imxarrab għasra u l-art kienet niexfa! Imma mbagħad Gidegħon staqsa lil Ġeħova biex din id-darba s-suf jibqaʼ niexef u l-art tixxarrab. U hekk ġara. B’dan Gidegħon kien konvint li Ġeħova kien għażel lilu. Hu ġabar lis-suldati tiegħu ħalli jiġġieldu lill-Midjanin.
Ġeħova qal lil Gidegħon: ‘Jien se nagħti lill-Iżraelin ir-rebħa. Imma peress li għandek ħafna suldati, int forsi taħseb li kien bis-saħħa tagħkom li rbaħtu l-gwerra. Għid lis-suldati li qed jibżgħu biex imorru d-dar.’ Għalhekk 22,000 suldat telqu, u kien fadal 10,000. Ġeħova mbagħad qallu: ‘Xorta għad għandek ħafna suldati. Ħudhom ħdejn ix-xmara u għidilhom biex jixorbu l-ilma. Żomm miegħek biss lil dawk li joqogħdu għassa għall-għadu huma u jixorbu.’ Kienu biss 300 raġel li baqgħu għassa. Ġeħova wiegħed lil Gidegħon li dawn l-irġiel kienu se jirbħu lil 135,000 suldat taʼ Midjan.
Matul dak il-lejl, Ġeħova qal lil Gidegħon: ‘Issa hu l-ħin biex tattakka lill-Midjanin!’ Gidegħon ta lil kull suldat tiegħu qarn u ġarra kbira b’torċa fiha. Hu qalilhom: ‘Ħarsu lejja u agħmlu kif nagħmel jien.’ Gidegħon daqq il-qarn, kisser il-ġarra tiegħu, xejjer it-torċa, u għajjat: ‘Is-sejf taʼ Ġeħova u taʼ Gidegħon!’ It-300 raġel għamlu l-istess. Il-Midjanin tant twerwru li bdew jiġru ’l hemm u ’l hawn. Bil-ġenn, huma bdew joqtlu lil xulxin. Għal darb’oħra, Ġeħova għen lill-Iżraelin jirbħu lill-għedewwa tagħhom.
“Sabiex il-qawwa iktar min-normal tkun t’Alla u mhux minna nfusna.”—2 Korintin 4:7