Teipa, israeleuanij sampa kitlauelkajkej Jehová uan pejkej kinueyichiuaj teotsitsij. Chikome xiuitl madiáneuanij kinichtekilijkej inintlapialjuaj uan kinnempoluilijkej ininmil. Israeleuanij kinekiyayaj momanauisej, yeka motlatiyayaj ipan tepetinij uan kampa tekakauako. Teipa, miakpa kiiljuijkej Jehová ma kinmanaui. Yeka Jehová kititlanki se iluikaejketl ma kiiljuiti Gedeón: “Jehová mitstlapejpenijtok, uan ta tielis se kuali tlateuijketl”. Gedeón kiiljuik: “¿Kenijkatsa nikinmanauis israeleuanij? Na amo niyajatis”.

Gedeón kinekiyaya kimatis tlaj Jehová nelia kitlapejpenijtoya. ¿Tlake kichijki? Kikuik se achi ipochkiyo borrego uan kitlalik tlalchi, uan kiiljuik Jehová: “Tlaj ijnalok san ni ipochkiyo borrego xolontos ika ajuechtli uan nopa tlali mokauas uaktok, nijmatis temachtli tinechtlapejpenijtok ma nikinmanaui israeleuanij”. Ualmostla, nopa ipochkiyo borrego xolontoya uan nopa tlali uaktoya. Uajka Gedeón kiiljuik Jehová: “Nama nijneki ma mokaua uaktok san ni ipochkiyo borrego uan nopa tlali ma xoloni”. Jehová kichijki tlen Gedeón kiiljuik. Kiampa Gedeón kimatki Jehová nelia kitlapejpenijtoya. Yeka, kinsentilik itlateuijkauaj pampa yaskiaj kinteuitij madiáneuanij.

 Jehová kiiljuik Gedeón: “Na nikinpaleuis israeleuanij ma tlatlanikaj. Ta tikinpia miakej motlateuijkauaj, uan ueliskiaj moiljuisej ininseltsitsij tlatlankej. Yeka katli majmauij, xikiniljui ma tlakuepilikaj ininchaj”. Tlakuepilijkej 22,000 tlakamej, uan nojua mokajkej 10,000. Uajka Jehová kiiljuik: “Nojua miakej. Xikinuika ipan atlajtli uan xikiniljui ma atlikaj. San xikintlapejpeni katli kuali tlachixtosej kema atlisej”. San 300 tlakamej kuali tlachixtoyaj kema atlikej. Maske inijuantij amo miakej eliyayaj, Jehová kiijtok kintlaniskiaj nopa 135,000 soldados madiáneuanij.

Nopa youali, Jehová kiiljuik Gedeón: “Nama uelis tias tikinteuiti madiáneuanij”. Gedeón kimakak sejse itlateuijka se kuakuajtli uan se komitl tlen kikalakilijtoyaj se kuauitl tlen lementoya, uan kiniljuik: “Xikitakaj tlen nijchiua, uan nojkia xijchiuakaj”. Gedeón kipitski nopa kuakuajtli, kitlapanki nopa komitl, kiojolinik nopa kuauitl tlen lementoya uan chikauak kiijtok: “¡Tiualauij ika Jehová ichikaualis uan ika Gedeón ichikaualis!”. Nochi nopa 300 tlakamej kichijkej kej Gedeón. Madiáneuanij tlauel momajmatijkej uan kampa ueli motlalojkej. Uan ininseltsitsij pejkej momijmiktiaj. Kiampa Jehová sampa kinpaleuik israeleuanij ma kintlanikaj ininkualankaitakauaj.