Satepan, israelitas oksepa kikaujkej Jiova uan peuak kinueyichiuaj tiotsitsin. Itech chikome xiujmej, akin kayomej Madián kinichtekiliayaj israelitas inintapialuan uan kinijtakouiliayaj inintatok. Yejua ika, israelitas motatiayaj itech ostokmej uan itech tepemej. Satepan, kitataujtijkej Jiova maj kinmakixtiani. Yejua ika Jiova kititanik se ángel maj kiluiti se telpoch akin monotsaya Gedeón: “Jiova mitsixpejpenak ximochiua se tateuijkej chikauak”. Gedeón kitajtanij: “¿Keniuj nikmakixtis Israel ta nejua amo teyi nichiujkej?”.

Gedeón kinekia kiyekmatis ke Jiova kiixpejpenka yejua. ¿Toni kichiuak? Kitalij talpan sentakoton tojmit uan kiluij Jiova: “Komo mosta kualkan nikita ke ajuach kiapaloj tojmit, sayoj ke tal amo apaltik, nikmatis ke tinechixpejpenak maj nikmakixti Israel”. Mostika, tojmit tel apaltik yetoya, sayoj ke tal amo. Ompa, Gedeón kitajtanij Jiova maj mostika kualkan tojmit amo apaltik yetoni, sayoj ke tal kemaj. Nejon oksepa mochiuak. Axkan Gedeón senkis kineltokak ke Jiova kiixpejpenka. Yejua ika kinsentilij itateuijkauan uan yayaj kinteuitij akin kayomej Madián.

 Jiova kiluij Gedeón: “Namechpaleuiti xitatanikan. Sayoj ke kemej nankinpiaj miakej tateuianij, uelis nankinemiliskej ke nantatankej nanmoselti. Okachi kuali xikinilui akin mouij maj mokepakan ininchan”. Mokepkej 22,000 takamej, uan 10,000 mokaujkej. Satepan Jiova kijtoj: “Tel miakejok. Xikinuika kampa onkak at uan xikinilui maj tayikan. Sayoj xikinixpejpena akin keman tayitoskej at no motachilijtoskej ox uitse akin kinixnamiki”. Sayoj 300 takamej tachixtoyaj keman tayiaj at. Jiova motenkauak ke nejon tateuianij kintaniskiaj 135,000 tateuianij kayomej Madián.

Nejon youak, Jiova kiluij Gedeón: “Axkanya moneki tikinteuitiuj akin kayomej Madián”. Gedeón kimakak sejse itateuijkauj se kuaomit uan se komit tein taijtik kipiaya se kouit tein xotatoya, uan kiniluij: “Xinechitakan uan xikchiuakan tein nejua nikchiuas”. Gedeón kikakistiltij kuaomit, kitapanak komit, kiuiuikak kouit tein xotatoya uan tsajtsik: “¡Iespada Jiova uan Gedeón!”. Nejon 300 tateuianij no ijkon kichiujkej. Akin kayomej Madián tel moujkamikiaj uan noyampa tsikuiniaj. Uan kemej amo kimatiaj toni panouaya, peuak yejuan momijmiktiaj. Oksepa, Jiova kinpaleuij israelitas maj kintaninij akin kinixnamikiaj.