Ba gafuriata, faröi ndraono Gizaraʼeli khö Yehowa ba lafosumange lowalangi faya. Ba zi fitu fakhe faʼara, asese lafakiko ira niha Midiano mbasitö ndraono Gizaraʼeli ba latagö guriföra. Labiniʼö ira iraono Gizaraʼeli ba dögi narö gara hegöi ba hili enaʼö tola telumöʼö ira moroi khö ndra niha Midiano. Laʼandrö khö Yehowa ba wanolo yaʼira. Tobali, ifatenge samösa malaʼikania Yehowa ba wamalukhaisi si samösa ira matua sotöi Gideono. Imane malaʼika andrö, ’No ifili ndraʼugö Yehowa. Tobali ndraʼugö sabölö ba wasuwöta.’ Manofu Gideono, ’Hewisa wa tola utolo ndraono Gizaraʼeli? Hana, haniha ndraʼodo andre.’

Hewisa enaʼö faduhu dödö Gideono wa yaʼia nifili Yehowa? Ibologö nukha wol tou ba danö ba imane khö Yehowa, ’Mahemolu sihulö wongi, na abasö nukha andre börö namo ba otufo danönia, eluahania sindruhu-ndruhu omasiʼö utolo ndraono Gizaraʼeli.’ Mahemolunia, abasö nukha andrö hizaʼi otufo danönia! Aefa daʼö, ifuli zui iʼandrö Gideono enaʼö mahemolunia nukha daʼö zotufo ba tanönia zabasö.  Alua daʼö. Lua-luania faduhu dödö Gideono wa sindruhu-ndruhu no ifili ia Yehowa. Tobali, iʼowuloi zaradadu ba wanuwö Midiano.

Imane Yehowa khö Gideono, ’Ufemöna ndraono Gizaraʼeli. Hizaʼi börö me ato sibai zaradadumö, öwai dania börö waʼabölömö wa tola mönaʼö. Waʼö enaʼö mangawuli manö zaradadu sataʼu.’ Börö daʼö, 22.000 zaradadu sangawuli ba toröi tö 10.000. Aefa daʼö imane Yehowa, ’Ato sibai nasa zaradadumö. Fatenge ira ba nungo nidanö ba yalabadu nidanönia. Sombadu idanö ba samakhölö-khölö yaʼia, daʼö nifiliu.’ Ha 300 zaradadu zamalua simane daʼö. Fazazi Yehowa wa hasambalö lakalaisi zaradadu Midiano si 135.000.

Ba zi bongi daʼö, imane Yehowa khö Gideono, ’Iadaʼa ginötönia ba wanuwö niha Midiano!’ Ibeʼe dorofe khö zaradadunia Gideono hegöi buli-buli sebua, ösinia solo. Imane, ’Mifaigi ndraʼo, ba mifalua zimane nifaluagu.’ Ifoli dorofenia Gideono, irasa mbuli-bulinia, ba ifaligoi solonia ba muʼao ia, ’Föda Yehowa ba Gideono!’ Lafalua göi daʼö ira saradadunia si 300. Ataʼu niha Midiano, ba oi zara moloi ira misa. Börö waʼakaliru, andrö faoma labunu nawöra. Sakali tö, itolo zui ndraono Gizaraʼeli Yehowa irege tola lakalaisi zi faʼudu khöra.