Ízrel dineʼé éí Jiihóvah baa náá dajiyooznah, áko edaʼalyaii bichʼįʼ nidahojiłáago baa nízhdiikai. Mídiyan dineʼé Ízrel dineʼé bilı̨́ı̨́ʼ deiniʼįįh dóó hadáʼákʼeh nidayiiłchxǫǫhgo tsostsʼid nááhai. Dziłdi dóó tsé aʼáán góneʼ Mídiyan dineʼé bitsʼąą nidazhʼnitʼin. Yisdánihínííł dajiníigo Jiihóvah nídajookąąh. Éí biniinaa Gídiyan joolyéego Jiihóvah níłchʼi naalʼaʼí hachʼįʼ ayííłʼaʼ. Níłchʼi naalʼaʼí Gídiyan ííłní: ‘Jiihóvah nándiiłtı̨́, áko diné doo náhinilyéesii nílı̨́į doo.’ Gídiyan naʼízhdééłkid, ‘Tʼáadoo nishłíní da, áko haitʼéego Ízrel yisdádeeshnił?’

Gídiyan éí Jiihóvah náhodiiłtínígíí haʼátʼíí bee hoł bééhodoozįįł? Hoł bééhodoozįįł biniyé aghaaʼ niʼgi nizhníłjool áádóó Jiihóvah kóbizhdííniid: ‘Ahbínígo díí aghaaʼ ditłéeʼgo áádóó niʼ hóółtseigo binahjįʼ shił bééhodoozįįł.’ Biiskání ahbínígo aghaaʼ ditłééʼ áádóó niʼ hóółtseigo jiiłtsą́. Gídiyan ánáázhdooʼniid: ‘Ahbínígo díí aghaaʼ yíłtsei doo áádóó niʼ ditłééʼ doo.’ Ájíní yę́ę bikʼeh áhoodzaa. Gídiyan éí Jiihóvah náhodiiłtínígíí hoł bééhoozin áádóó siláo áłah ájíléehgo baa nízhdiidzá.

 Jiihóvah éí Gídiyan ííłní: ‘Nisiláo tʼóó ahayói, áko akʼeh dadeedlı̨́ı̨́ʼ danohsin doo. Shí éí Ízrel dineʼé bíká adeeshwołgo akʼeh dadidoodleeł. Siláo nídaaldzidígíí éí hooghangóó bééʼdííłnih.’ Áko 22,000 nídaasdzíidgo anáhaaskai áádóó 10,000 éí tʼáá ákǫ́ǫ́. Jiihóvah ánáádíʼní: ‘Siláo tʼahdii tʼóó ahayói. Tooh nílı̨́ı̨́góó dííʼish áádóó tó daahdlą́ bididííniił. Tó deidlą́ągo anaʼí yíká hadaʼasíídígíí tʼéí bitsʼá díínił.’ Áko 300 tʼéí hadaʼasíidgo tó dayoodlą́ą́ʼ. Hastóí tʼáá kójíltʼéhí Mídiyan dineʼé bisiláo 135,000 ánéelą́ąʼgo bikʼeh dazhdidoodleeł níigo Jiihóvah yee nihoníʼą́.

Tʼáá éí bitłʼééʼ Jiihóvah Gídiyan ííłní: ‘Kʼad Mídiyan dineʼé bikʼiidoohjah.’ Gídiyan éí bisiláo adeeʼ bee íʼdílzoołí dóó ásaaʼ honooyééł biiʼ naaznilgo deíjáahgo ájiilaa. Gídiyan bisiláo ííłní: ‘Dashinółʼı̨́, áko ásdzaaígíí bikʼehgo ádadoohnííł.’ Gídiyan bee íʼdílzoołí yee ádííniid, ásaaʼ yidiiłtaaʼ, honooyééł yił dah nidilniihgo kóníigo dilwosh: ‘Bóhólníihii índa Gídiyan bidiltłish!’ Áko siláo tʼáá ákódajiidzaa. Mídiyan dineʼé nídaasdzíidgo taozhjééʼ. Doo ééhózingóó tʼáá bí ałkʼiijééʼ. Kótʼéego Jiihóvah éí anaʼí bitsʼą́ąjįʼ Ízrel dineʼé yisdáyíínil.