Nzinlii, Yizilayɛma dele atua tiale Gyihova na bɛzonlenle awozonle. Yemɔti Medeanema wuale bɛ nyɛmoa na bɛzɛkyele bɛ ɛya nu ninyɛne ɛvolɛ nsuu. Amaa Medeanema asa anga Yizilayɛma la, bɛnriandile bɛhɔveale awolɛ mbɔne nu. Bɛzɛlɛle Gyihova kɛ ɔlie bɛ. Yemɔti Gyihova zoanle ye anwumabɔvolɛ wɔ kpavolɛ bie mɔɔ bɛfɛlɛ ye Gedɛyɔn la ɛkɛ. Anwumabɔvolɛ ne hanle kɛ: ‘Gyihova ɛkpa wɔ kɛ sogya kpanyinli.’ Gedɛyɔn bizale ye kɛ: ‘Menzɔho ɛhwee, kɛ ɔkɛyɛ na mealie Yizilayɛma ɛ?’

Kɛ ɔkɛyɛ na Gedɛyɔn anwu ye kɛ Gyihova ɛkpa ye ɛ? Ɔvale boane nwoma sinli ɔdole azɛlɛ ne anwo, na akee ɔzele Gyihova kɛ: ‘Saa ɔkadwu nwonlomɔ na ɛbɔlɛ ne ɛloa boane nwoma ɛhye na azɛlɛ ne anwo tɛde resee a, mebanwu kɛ wɔmɔ Gyihova a wɔkpa me a.’ Aleɛ hyenle la ɛnee boane nwoma ne ɛloa noko azɛlɛ ne anwo tɛde resee! Noko Gedɛyɔn hanle kɛ Gyihova ɛmaa ɔnwu kɛ ɔkadwu nwonlomɔ la ɛnee azɛlɛ ne anwo ɛloa na boane nwoma ne ɛyɛ resee. Mɔɔ Gedɛyɔn nwunle ye zɔ la, ɔliele ɔlile bɔkɔɔ kɛ Gyihova  a ɛkpa ye a. Ɔboɔboale ye sogyama ne anloa kɛ ɔ nee Medeanema kaho.

Gyihova zele Gedɛyɔn kɛ: ‘Mebamaa Yizilayɛma ali konim. Noko wɔ sogyama ne zonle somaa. Bɛ adwenle bayɛ bɛ kɛ bɛ anwosesebɛ ti a bɛlile konim a. Ka kile bɛ nuhua mɔɔ sulo la kɛ ɔzia ɔhɔ sua nu.’ Yemɔti sogyama 22,000 ziale na ɔhale 10,000. Gyihova eza hanle kɛ: ‘Sogyama ne anwo tɛso. Fa bɛ kɔ azule ne anloa na ka kile bɛ kɛ bɛnlo nzule. Anrɛɛ nea menli mɔɔ bɛlɛno nzule ne a bɛmaa bɛ ti zo bɛnea saa bɛ agbɔvolɛ ɛlɛba la.’ Mɔɔ ɔyɛle ɛhye la, ɔnyianle bɛ nuhua 300 pɛ. Gyihova bɔle ɛwɔkɛ kɛ ɔbava menli ekyi ɛhye yeazɛkye Medean sogyama 135,000 ne.

Zɔhane nɔe ne, Gyihova hanle hilele Gedɛyɔn kɛ: ‘Mekɛ ɛdwu kɛ ɛteta Medeanema!’ Gedɛyɔn vale aweɛne, mbuakɛ mgbole nee tɛkɛ wulale ye menli ne asa nu na ɔzele bɛ kɛ: ‘Bɛnlea na bɛyɛ mɔɔ mekɛyɛ la bie.’ Akee Gedɛyɔn bɔle ye aweɛne ne anu, ɔbɔle ye buakɛ ne, ɔwosole ye tɛkɛ ne na ɔdeanle nu kɛ: ‘Gyihova nee Gedɛyɔn konle dadeɛ ne ɛne!’ Ye menli 300 ne amuala yɛle mɔɔ ɔyɛle la bie. Medeanema anye zo danle bɛ na bɛguale ye nwo. Kɛmɔ ɛnee bɛ nye zo ɛda bɛ la ati, bɛpɛle bɛ nwo bɛhuhunle bɛ nwo. Gyihova maanle Yizilayɛma lile bɛ kpɔvolɛma anwo zo konim bieko.