Met de Tiet deeden de Israeliten sikj wada von Jehova wajchdreien un fungen aun faulsche Jetta auntobäden. Säwen Joa lank stoolen de Midianita de Israeliten emma äare Tieren fuat un vedorwen dee äare Arnt. De Israeliten musten sikj en de Heelen un en de Boaj vestäakjen. Dee prachaden Jehova no Help. Doawäajen schekjt Jehova eenen Enjel no eenen jungen Maun, waut Gideon heet. De Enjel säd: “Jehova haft die jewält, daut du een stoakja Kjrichsmaun sennen saust.” Gideon fruach: “Woo saul ekj Israel raden? Met mie es je daut nuscht.”

Woo wist Gideon, daut Jehova am jewält haud? Gideon läd een Biet Woll oppe Ieed un säd to Jehova: “Wan de Woll zemorjes woat vom Deiw naut sennen un de Ieed drieech, dan weet ekj, daut ekj Israel raden saul.” Zemorjes wia de Woll suppnaut un de Ieed drieech! Oba dan fruach Gideon, aus de Woll dän näakjsten Dach zemorjes kunn drieech sennen un de Ieed naut. Aus daut dan soo wia, wist hee neiw, daut Jehova am jewält haud. Hee hold siene Soldoten toop toom jäajen de Midianita gonen.

 Jehova säd to Gideon: “Ekj woa de Israeliten loten jewennen. Oba wiels jie soo väl Soldoten sent, kunn jie met eenst denkjen, daut jie selfst dän Kjrich jewonnen hauden. Saj to aule, waut Angst haben, see sellen no Hus gonen.” Dan jinjen 22 000 Soldoten no Hus un 10 000 bleewen doa. Jehova säd dan: “Doa sent noch too väl. Brinj dee nom Riefa un saj, dee sellen Wota drinkjen. Nemm bloos dee, waut biem drinkjen oppaussen, aus doa wua Fiend sent.” Bloos 300 Mana pausten opp, aus dee drunken. Jehova säd, daut dise poa Mana de 135 000 midianitische Soldoten jewennen wudden.

Dee Nacht säd Jehova to Gideon: “Nu es de Tiet toom jäajen de Midianita gonen!” Gideon jeef siene Mana Blosdinja un groote Krucken, wua Fiastakja bennen vestoaken wieren. Hee säd to dee: “Kjikjt no mie un doot krakjt soo aus ekj.” Gideon blosd met sien Blosdinkj, kjield siene Kruck twei, weifeld met sienen Fiastock un breld: “Daut Schwieet von Jehova un von Gideon!” Aul siene 300 Mana deeden dautselwje. De Midianita wort grulich angst un dee randen aulawäajen han. Doa wia soon Derchenaunda, daut dee aunfungen, eena jäajen dän aundren to feiten. Nu haud Jehova de Israeliten wada jeholpen, äare Fiend to jewennen.