Israelitasqa Jehová Diosmanta karunchakuspa waj dioskunata yupaycharqanku. Madianitastaj qanchis watasta animalesninkuta, chajrasninkoj poqoynintapis suwarqanku. Israelitasqa qaqa juskʼuspi, orqospi ima pakakorqanku. Chantá Jehová Diosmanta yanapata mañakorqanku. Jehová Diostaj angelninta Gedeón sutiyoj jovenman kacharqa. Chay angelqa nerqa: “Jehová Dios ajllasunki maqanakoj soldado kanaykipaj”, nispa. Gedeontaj nerqa: “Mana imapischu kani. ¿Imaynatataj israelitasta salvasajri?”, nispa.

Gedeonqa ajllasqa kasqanta yachananpaj, millmata pampaman churaspa Diosman nerqa: “Sichus qʼaya paqarinpaj millma chhullawan joqʼochasqa kanqa, jallpʼataj chʼaki kanqa chayqa, yachasaj ajllawasqaykita israelitasta salvanaypaj”, nispa. Qʼayantinpajtaj ajinapuni karqa. Gedeonqa Diosman nerqa qʼayantinpaj millmañataj chʼaki kananta, jallpʼataj joqʼo. Chaypis ajinallataj karqa. Ajinapi Gedeonqa yacharqa Dios payta ajllasqanta. Chantá soldadosninta tantaykorqa madianitaswan maqanakunanpaj.

 Jehová Diosqa Gedeonman nerqa: “Israelitasta yanapasaj atipanankupaj. Jinapis ashkha soldados kasqankurayku, paykunallamanta atipasqankuta yuyankuman. Chayrayku niy, manchachikojkuna ripunankuta”, nispa. Jinamanta 22.000 riporqanku, 10.000 runastaj quedakorqanku. Chantá Jehová Diosqa nerqa: “Ashkharajpuni kanku. Paykunata mayuman pusay yakuta ujyanankupaj. Tukuynejta qhawaspa yakuta tomajkunallawan qhepakunki”, nispa. Ajinata tomajkunaqa 300 runaslla karqanku. Jehová Diostaj nerqa, paykuna chay 135.000 madianitasta atipanankuta.

Chay chʼisi, Jehová Diosqa Gedeonman nerqa: “Madianitaswan maqanakamuy”, nispa. Gedeontaj soldadosninman uj putututa, uj wichʼitawan kʼanchachinayojta jaywaspa nerqa: “Qhawawaychej, noqa jinataj ruwaychej”, nispa. Gedeonqa putututa waqacherqa, wichʼinta pʼakirparerqa, kʼanchachinantataj pataman oqharispa kuyucherqa, qhaparerqataj: “Kayqa Jehová Diospata, Gedeonpata maqanakuynin”, nispa. Chay 300 soldadospis ajinallatataj ruwarqanku. Madianitastaj mayta mancharikuspa muspharqanku, paykunapurataj wañuchinakorqanku. Ajinata Jehová Diosqa ujtawan israelitasta yanaparqa enemigosninkuta atipanankupaj.