Qʼaxinaq kebʼ oxibʼ tiempo, ri israelitas xkiya chi kan Jehová xuqujeʼ xkimaj chi kiqʼijilaxik e dioses che e qastzij taj. Pa wuqubʼ junabʼ, ri e winaq re Madián xekelaqʼaj ri e kichikop xuqujeʼ xkibʼan kʼax che ri kitikoʼn ri israelitas. Rech kkitoʼ kibʼ chkiwach, ri israelitas kkikʼuʼ kibʼ pa taq jul xuqujeʼ juyubʼ. Kʼisbʼal re xkitaʼ toqʼobʼ rech Jehová keʼukolo. Rumal laʼ Jehová xutaq lo jun ángel rech xchʼaw rukʼ jun ala ubʼiʼ Gedeón, xubʼij che: «Jehová xatuchaʼo rech katux jun nimalaj ajchʼoj». Gedeón xutaʼ che: «¿Jas kinbʼan che ukolik ri Israel rumal che nim ta nuqʼij?».

Gedeón qas kraj kretaʼmaj che areʼ ri xchaʼ rumal Jehová. ¿Jas xubʼano? Xuya jun lana pa ri ulew tekʼuriʼ xubʼij che Jehová: «We chweʼq kchʼaqiʼ ri lana rumal ri raxqʼabʼ, are kʼu ri ulew chaqiʼj, kwetaʼmaj riʼ che in xinachaʼ che ukolik ri Israel». Chukabʼ qʼij, ri lana sibʼalaj chʼaqalik, are kʼu ri ulew chaqiʼj. Tekʼuriʼ, Gedeón xutaʼ che Jehová che chukabʼ qʼij ri lana kchʼaqiʼ taj, are kʼu ri ulew kchʼaqiʼk. Ri xutaʼ Gedeón jumul chik xkʼulmatajik. Gedeón qas xuchʼobʼo che Jehová qastzij xuchaʼo. Rumal laʼ xeʼumulij ri soldados rech kbʼe pa chʼoj chkij ri madianitas.

 Jehová xubʼij che Gedeón: «Keʼintoʼ ri israelitas rech kechʼakanik. Are kʼu rumal che e kʼo kʼi soldados, weneʼ kkichomaj che kumal e areʼ xechʼakanik. Rumal laʼ chabʼij chke ri kkixibʼij kibʼ che utz ketzalij pa kachoch». Rumal laʼ 22.000 achijabʼ xetzalijik, e 10.000 xekanaj kanoq. Tekʼuriʼ Jehová xubʼij: «Kʼa e kʼi na ri e kʼo awukʼ. Cheʼakʼamaʼ bʼi chuchiʼ ri nimaʼ tekʼuriʼ chabʼij chke che kkitij jaʼ. Xaq xiw kekanaj kan awukʼ ri kekalwachij ri kikʼulel are chiʼ kkitij kijoron». Xa e 300 achijabʼ xkibʼan wariʼ are chiʼ xkitij kijoron. Jehová xubʼij che ri alaj jupuq riʼ kekun che kichʼakik ri e 135.000 soldados re Madián.

Pa ri chaqʼabʼ riʼ Jehová xubʼij che Gedeón: «Chanim utz kixbʼe chkij ri madianitas». Gedeón xuya jujun rukʼaʼ wakax xuqujeʼ e xaruʼ rukʼ antorcha chke, xuqujeʼ xubʼij chke: «Chiwilaʼ tekʼuriʼ kibʼan ri kinbʼan in». Gedeón xroqʼisaj ri rukʼaʼ wakax, xuwulij ri xaruʼ, xusilabʼaj ri rantorcha tekʼuriʼ xuraq uchiʼ: «¡Ri uʼespada ri Jehová xuqujeʼ ri Gedeón!». Ri e 300 achijabʼ jeʼ xkibʼano. Ri madianitas sibʼalaj kixibʼim kibʼ xuqujeʼ xeʼanimaj bʼik. Rumal che, qʼalaj taj jachin ri kachiʼl, xkikamisaj kibʼ chibʼil kibʼ. Jumul chik, Jehová xeʼutoʼ ri israelitas rech xekichʼak ri e kikʼulel.