Tiempu pasariptinqa, yapëmi israelïtakunaqa Jehoväta jaqirir mana rasumpa dioskunata adorar qallëkuyarqan. Y Madian nunakunam qanchis watapa animalninkunata suwapar y cosëchankunata perditsir kayarqan. Pëkunata mantsarmi israelïtakunaqa machëkunaman y jirkakunaman ratakuyaq (tsinkakuyaq). Tsëmi imanö këta mana puëdir salvëkunampaq Jehoväta rogakuyarqan. Jehoväqa juk angeltam kacharqan Gedeon jutiyoq jövinta kënö ninampaq: “Qamtam pelyëta yachaq nuna kanëkipaq Jehovä akrashurqunki”. Gedeonnam kënö nirqan: “Noqaqa manam imapistsu kä, tsëqa, ¿imanöraq Israel nacionta salväman?”.

Gedeonqa pëta Jehovä akrashqa kanqantam alleq musyëta munarqan. ¿Y imatataq rurarqan? Juk vellon millwata patsaman churarirmi Jehoväta kënö nirqan: “Sitsun kë millwa oqu warämunqa, peru patsaqa tsaki këkanqa, tsëqa alleqmi musyashaq Israelta salvanäpaq akramashqa kanqëkita”. Waränin qoyaqa, millwaqa oqum warämurqan, peru patsaqa tsakim këkarqan. Tsënam Gedeonqa Jehoväta yapë nirqan waränin qoyapaq millwa tsaki waränampaq, peru patsaqa oqushqa kanampaq. Y Gedeon ninqanmi yapë pasakurqan. Tsënam Gedeonqa alleq musyarirqan pëta Jehovä akranqanta. Tsëmi Madian nunakunawan pelyaq ëwanampaq soldädukunata juntarqan.

 Jehoväqa kënömi Gedeonta nirqan: “Venciyänampaqmi israelïtakunata yanapashaq. Peru mëtsikaqmi kayan, itsa pensayanman kikinkunalla venciyanqanta. Mejorqa mantsakoq kaqkuna wayinkunaman kutikuyätsun”. Tsënam, 22.000 soldädukuna wayinkunaman kutikuyarqan, y 10.000 soldädukunallam quedayarqan. Peru Jehoväqa kënömi nirqan: “Alläpa atskaran kayan. Juk mayuman pushëkur yakuta upuyänampaq nï. Y chikiyäshoqnikikunata rikachakur rikachakur upoq kaqkunallata quedatsi”. Pushariptinqa, 300 soldädukunallam tsënö upuyarqan. Tsënam Jehoväqa nirqan pëkunallawan Madianpita 135.000 soldädukunata ushakätsinampaq kaqta.

Tsë paqasmi Jehoväqa Gedeonta kënö nirqan: “Jinan höra ëwayë Madian nunakunata ushakätsiyänëkipaq”. Tsënam Gedeonqa pükar waqatsiyänan waqrakunata y rawrëkaq antorchakunayoq kuntukunata soldädunkunata qorqan, y kënö nirqan: “Rikäyämë, y noqa ruranqällata rurayë”. Nïkurmi waqrata pükar waqatsirqan, kuntuta tsampirqan, y rawrëkaq antorchata wakman këman kuyutsirqan, y kënö nirqan: “¡Jehoväpa y Gedeonpa espädan!”. Tsënam, 300 soldädunkunapis tsënölla rurayarqan. Tsëta rikëkurmi Madian nunakunaqa alläpa feyupa mantsakäyarqan, y juiciunnaqmi wakpa këpa ëqikuyarqan. Y pantarmi kikinkunapura wanutsinakuyarqan. Tsënömi Jehoväqa israelïtakunata yapë yanaparqan chikeqninkunata venciyänampaq.