Tiempo yalijpica israelitacunaca cutinmi Jehovata na cazushpa yanga dioscunata adoranajurca. 7 huatacunatami Madián llactamanda gentecunaca israelitacunapa animalcunata shuhuashpa, tarpushcacunata tucuchishpa llaquichinajurca. Chaimi israelitacunaca madianitacunata ninanda manllashpa cuevacunapi, urcucunapi pacajunajurca. Chaimandami paicunaca salvachun Jehovata mañanajurca. Shina mañanajujpimi chaira viñaj Gedeonbaman Jehová Diosca shuj angelta cashna nichun cacharca: Jehová Diosca candami shinlli, alipacha macanajuj soldado cachun agllashca nishpa. Chaimi Gedeonga cashna nirca: Tucuicunapa jipa cashpaca ¿imashinata israelitacunataca salvashayari? nishpa.

Gedeonga Jehová paita ciertopacha agllashcatami yachangapaj munarca. Chaita yachangapaca ¿imatata rurarca? Gedeonga llama milmata alpapi churashpami Jehovata cashna nirca: ‘Caya tutamanda, chai milmata jamzi paramuhuan mutiyachishpa, chai muyundi alpa chaquishca pacarijpica, can nishcashnallata israelitacunata quishpichinatami yachasha’ nishpa. Cayandi punlla ricujpica milmaca mutiashca, cutin alpaca chaquishcami carca. Shinapash Gedeonga cutinmi Jehovata cashna nirca: ‘Cunan tutaca chai muyundi alpataca jamzi paramuhuan mutiyachishpa, milmatalla chaquishcata pacarichipai’ nishpa. Chaitapashmi Jehová Diosca pactachirca. Shinami Gedeonga Jehová paita agllashcata crishpa madianitacunahuan macanajungapaj paipa soldadocunata tandachirca.

 Jehová Diosca ‘Gedeondaca cashnami nirca: “Madianitacunata cangunapaj maquipi ñuca churangapaca, canhuan tandanajushca gentecunaca ashtacapachami?”’. ‘Paicuna mishashpaca ñucanchi maquihuanmi quishpirircanchi’ ninajungami. Ama shina ninajuchunga tucuicunaman cashna ningui: ‘Maijanbash manllajushpaca huasiman tigraichilla’ nishpa. Shina nijpimi 22 mil soldadocuna tigrajpi, 10 mil soldadocunalla quedarca. Chai jipaca Jehová Diosca nircami: ‘Gentecunaca taucarami. Chaimanda yacu ladoman pushashpa’ yacuta ufiachun mandai. Yacuta ufiajushpa contracuna shamujujta o na shamujujta yaipi cajcunallami macanajungapaj quedachun agllana cangui nishpa. Tucuicunamandaca 300 soldadocunallami shina yaipi yacuta ufianajurca. Chaimi Jehová Diosca, chai 300 soldadocunallami 135 mil contra madianitacunata mishanga nirca.

Chai tutaca Jehová Diosca Gedeondaca nircami: “Jatarishpa, madianitacuna tianajuj carpacunaman urai rilla. Paicunataca, cambaj maquipimi churarcani” nishpa. Chaimi Gedeonga soldadocunaman cachucunata, rupajuj michungunata funducunapi churashpa curca. Shinallata, “ñucata ali ricushpa, ñuca imashna rurajunshnallata ruranguichi” nishpa. Chai jipami Gedeonga cachuta huacachirca, pai charijushca fundutapash faquirca, rupajuj michundapash caiman chaiman cuyuchishpa cashna caparirca: Jehová Diospa, “Gedeonbaj espadamandami macanajugrinchi” nishpa. Chaimi 300 soldadocunapash shinallata rurajpi madianitacunaca ninanda manllarishpa caiman chaiman calpanajurca. Shina caiman chaiman calpanajuimandami paicunapura macanajunajurca. Shinami Jehová Diosca cutin israelitacuna paicunapa contracunata mishachun ayudarca.