Sar nakhlja o vreme, o Izraelcija paljem čhinavdže te služinen e Jehovase hem počmindže te služinen e hovavne devljendže. Efta berš o Madijancija čordže e Izraelcenge životinjen hem uništindže sa so hine ljen sadimo ko njive. Te šaj te našen ando Madijancija, o Izraelcija morandilje te garaven pe ko pećine hem ko planine. On but molindže e Jehova te spasini ljen. Odoljese, o Jehova bičhaldža jekhe anđele ko jekh terno čhavo, kova vičindža pe Gedeon. O anđeo phendža ljese: „O Jehova birindža tut te spasine e narodo.“ O Gedeon pučlja: „Sar ka spasinav e Izraelcen? Ko hijum me te čerav odova?“

O Gedeon manglja te uverini pe so o Jehova čače birindža lje. Odoljese, ov čhivdža bakrani koža upri koja hine vuna ki phuv hem phendža e Jehovase: „Tajsa sabalje ako i vuna ka ovel sapani, a i phuv šuki, ka džanav so mangeja me te spasinav e Izraelcen.“ Tajsato dive, i vuna hine but sapani, a i phuv šuki. Ama, o Gedeon rodindža pana diso ando Jehova. Ov pučlja e Jehova tajsa sabalje te čerel i vuna te ovel šuki, a i phuv sapani. Adžahar hem ulo. Akava uverindža e Gedeone so o Jehova birindža lje. Odoljese, čedindža peklje vojska te šaj te borinen pe e madijansko vojskaja.

 O Jehova phendža e Gedeonese: „Ka pomožinav e Izraelcendže te pobedinen. Ama, isi tut but vojnikija, šaj te mislinen so kokri pobedindžen ljen. Odoljese, phen sarinendže kola darana te džan čhere.“ Tegani, 22 000 vojnikija dželje pese čhere, a 10 000 ačhilje. O Jehova phendža: „Pana isi but vojnikija. Igar ljen ki reka hem phen ljendže te pijen pani. Lje tuvaja samo okoljen kola tane oprezna dži pijena pani hem dikhena da li avela oljengo dušmani.“ Samo 300 vojnikija pilje adžahar pani. O Jehova obećindža so on ka pobedinen e madijansko vojska koja hine la 135 000 vojnikija.

Odija rat, o Jehova phendža e Gedeonese: „Akana napadin e Madijancen.“ O Gedeon dindža pe manušendže šinga hem bare khore ano kola hine o baklje. Tegani phendža ljendže: „Dikhen so me čerava hem tumen čeren adžahar.“ O Gedeon phudindža ki šing, phaglja o khoro, vazdindža i baklja hem glasno vičindža: „O mač e Jehovaso hem e Gedeoneso!“ Odmah palo odova, o 300 vojnikija čerdže isto adžahar. O Madijancija but darandilje hem počmindže te našen ko sa o strane. Odobor hine bunime so počmindže te mudaren pe maškaro peste. O Jehova hem akava puti pomožindža e Izraelcendže te pobedinen peklje dušmanen.