Прожыля время израильтяноря упалэ на кандэнас лэ Иеговас и линэ тэ тэлён хохавнэ дэвлэнди. Семь бэрш и мадианитяноря залэнас лэнго ското и терэнас, кай тэ на ашэлпэ урожаё. Кай тэ фэринпэ лэндар, израильтяноря гарадёнас андэ пещеры и андэ плая. Вонэ линэ фартэ тэ мангэн лэ Иеговас тэ поможый лэнди. Важ када о Иегова бишалдя лэ анӷелос каринг о Гедеоно. О анӷело ԥэндя: «О Иегова витидя тут. Ту ашэса зорало воино». О Гедеоно пушля: «Сар мэ спасысарава о Израилё? Мэ же найбаро мануш».

О Гедеоно закамля тэ диқэл, кай о Иегова витидя лэс. Во пэ ԥув росшутя о пушом и ԥэндя лэ Иеговасти: «Если тэсара о пушом авэла тиндо лэ друсындэстар, ай и ԥув шуки, мэ полава, кай ту витидян ман». Пэ авэр тэсара о пушом сас вся тиндо, ай и ԥув, шуки! Тоди о Гедеоно мангля, кай пэ авэр тэсара о пушом тэ авэл шуко, ай вся и ԥув тинди. Кадя вся и сас. О Гедеоно драго поля, кай о Иегова витидя лэс. Тоди во стидя лэ воинонэн, кай тэ марэлпэ лэ манушэнца анда Мадиамо.

 О Иегова ԥэндя лэсти: «Мэ стерава, кай израильтяноря тэ вицэлэн и война. Но тутэ фартэ бут мануша, и ту можешь тэ погиндос, кай ту вицэлдян и война. Ԥэн кодэлэнди, ко дарал, тэ жан цэрэ». И ашэля кадя, кай 22 000 воиноря жылэтар, ай 10 000 ашэлэпэ. О Иегова ԥэндя: «Всаек лэ воинонэн инке фартэ бут. Андяр лэн каринг и лэн тэ пэн паи. Ашав кодэлэс, ко сар пэл о паи, шол сама па рига». Кати 300 мануша кадя терэнас. О Иегова дя алав, кай кадэла набут мануша, вицэлэна и война мадиамсконэ воинонэнца, савэн сас 135 000.

Андэ кодэя рят о Иегова ԥэндя лэ Гедеоности: «Поджыля время тэ умарэн лэ вороӷонэн!» О Гедеоно дя пэстирэ манушэнди по ек рого и по ек баро кувшино. Андэ кувшиноря слинэ кашта, пэ савэ ԥаболас яг. Во ԥэндя: «Диқэн пэр мандэ, со мэ терава терэн кадяжэ. Во задилабля андо роӷо, розмардя баро кувшино, кай тэ дицол каш, пэ саво ԥаболас яг и зацыписайля: «Лэ Иеговаско и лэ Гедеоноско мечо!» Всаворэ 300 воиноря стердэ кадяжэ. И мадианитяноря пэрэдарайлэ и рознашлэпэ андэ разни рига. Вонэ линэ тэ умарэн ек еқэс, важ кода кай на полэнас, со терэлпэ. Кадя о Иегова упалэ поможысардя лэ израильтянонэнди тэ вицэлэн и война лэ вороӷонэнца.