ICIGWA CA 34
Gideyoni atsinda Abamidiyani
Abisirayeli barasubiye guheba Yehova bongera gusenga ibigirwamana. Abamidiyani baramaze imyaka indwi babiba ibitungwa bongera bonona imirima yabo. Abisirayeli baca baja kwinyegeza mu bibuye bininibinini no mu misozi kugira bahunge Abamidiyani. Baratakambiye Yehova ngo abakize. Yehova yaciye atuma umumarayika ku musore yitwa Gideyoni. Uwo mumarayika yamubwiye ati: ‘Yehova yagutoye ngo ube umusoda akomeye cane.’ Gideyoni yaciye amubaza ati: ‘Jewe noshobora kurokora Abisirayeli? Nta co maze.’
None Gideyoni yari kumenya gute ko Yehova yamutoye? Yarashize ubwoya hasi, aca abwira Yehova ati: ‘Ejo mu gitondo ninasanga ubu bwoya bukanye ariko hasi humutse, nzoca menya yuko ushaka ko ndokora Abisirayeli.’ Bukeye yasanze bwa bwoya bukanye ariko hasi humutse! Mugabo Gideyoni yaciye asaba Yehova ko bukeye yosanga ubwoya bwumutse ariko hasi hakanye. Igihe yasanga vyagenze ukwo nyene, yaciye amenya neza ko Yehova yari yamutoye. Yaciye akoranya abasoda kugira baje kurwanya Abamidiyani.
Yehova yabwiye Gideyoni ati: ‘Nzotuma Abisirayeli batsinda. Ariko kubera mufise abasoda benshi, mwohava mwiyumvira ko mwatsinze kubera inguvu zanyu. Babwire uwufise ubwoba yisubirire muhira.’ Abasoda 22.000 baciye basubira muhira, hasigara 10.000. Yehova yarongeye kumubwira ati: ‘N’ubu baracari benshi. Bajane ku ruzi ubabwire banywe amazi. Abanywa amazi bariko bararaba ko ata mwansi abatera, abe ari bo gusa usigarana.’ Abasoda 300 gusa ni bo banyoye amazi muri ubwo buryo. Yehova yavuze ko abo basoda bakeyi bari gutsinda abasoda b’Abamidiyani 135.000.
Muri iryo joro, Yehova yabwiye Gideyoni ati: ‘Harageze ko mutera Abamidiyani!’ Gideyoni yaciye aha abasoda biwe inzamba n’imibindi mininiminini irimwo ibimuri. Yababwiye ati: ‘Mundabe, uko ngira abe ari ko mugira.’ Gideyoni yaravugije inzamba, aramena wa mubindi, arazungagiza ca kimuri, aca arasemerera ati: ‘Inkota ya Yehova n’iya Gideyoni!’ Ba basoda 300 bose baciye bagira ukwo nyene. Abamidiyani baragize ubwoba baca barashwiragira. Bariko barahunga, bagenda baricana hagati yabo. Yehova yari asubiye gufasha Abisirayeli gutsinda abansi babo.
“Ngo ububasha burengeye ubusanzwe bube ubw’Imana, ntibube ubuva kuri twebwe.”—2 Abakorinto 4:7
Raba kandi
BANDES DESSINÉES ZIGANA INKURU ZO MURI BIBILIYA
Yehova aremesha Gideyoni
Abagabo bari bayobowe na Gideyoni barasanganguye ingabo z’Abamidiyani naho umwumwe yabwirizwa guhangana n’Abamidiyani 450.
UDUKARATA TW’ABAVUGWA MURI BIBILIYA
Agakarata kavuga Gideyoni
Mu ntango yaratinyatinya, ariko mu nyuma yaragize umutima rugabo.
UDUKORWA TUJANYE N’AMASHUSHO
Umumarayika aremesha Gideyoni
Aka gakorwa ko gusiga amabara kagenewe abana b’imyaka 3 gushika kuri 6.
UDUKORWA TUJANYE N’AMASHUSHO
Yehova arishura amasengesho adomako
Abana b’imyaka 6 gushika ku 8 bazohimbarwa n’utu dukorwa twigisha akamaro ko gusenga badomako.
UDUKORWA TWO KWIYIGISHA TW’ABANA
Kuremeshwa n’abavukanyi bacu be na bashiki bacu
Niwereke abana bawe ukuntu boshobora gufasha abagenzi babo maze na bo bakabona kubafasha.
