A o faagasolo taimi, na lē toe tapuaʻi tagata Isaraelu iā Ieova ae amata ona tapuaʻi i atua sesē. E fitu tausaga na gaoia ai e tagata Mitiana manu a tagata Isaraelu ma faaleaga a latou meatotō. Ina ia sosola mai i tagata Mitiana, na ō ai tagata Isaraelu ma lalafi i totonu o ana ma mauga. Na latou talosaga atu iā Ieova e laveaʻi i latou. O lea na auina mai ai e Ieova se agelu i se alii talavou e igoa iā Kitiona. Na faapea mai le agelu iā te ia: ʻUa filifilia oe e Ieova e avea o se toa malosi.’ Ae na fesili atu Kitiona: ʻE faapefea ona ou faaolaina Isaraelu? O aʻu o se tagata faatauvaa.’

Na faapefea ona iloa e Kitiona ua filifilia o ia e Ieova? Na ia tuu le fulufulu mamoe i luga o le laueleele ma faapea atu iā Ieova: ʻPe afai e oo atu i le taeao ua susū le fulufulu mamoe i le sau ae mātūtū pea le laueleele, ona ou iloa lea ua e filifilia aʻu e faaolaina Isaraelu.’ I le taeao na sosoo ai, na matuā susū le fulufulu mamoe ae mātūtū le laueleele. Ae na toe talosaga atu foʻi Kitiona ina ia oo atu i le taeao e sosoo ai, ua mātūtū le fulufulu mamoe ae susū le laueleele. Ina ua tupu lenā mea, ona faatoʻā mautinoa loa lea e Kitiona ua filifilia o ia e Ieova. Na ia faapotopoto lana ʻautau e tau ma tagata Mitiana.

 Na faapea atu Ieova iā Kitiona: ʻOu te tuuina atu le manumalo i tagata Isaraelu. Ae talu ai e toʻatele au fitafita, atonu o le a outou manatu ai na outou manumalo ona o lo outou malosi. Ia fai atu i so o se tasi e fefe e toe foʻi i lona aiga.’ O lea na toe foʻi ai fitafita e 22,000 i o latou aiga, ae totoe ai na o le 10,000. Ona faapea mai lea o Ieova: ʻO loo toʻatele pea fitafita. Ia ave i latou i le vai ma faatonu e feinu. Ia tuu na o i latou e feinu ma mataala e vaai le fili.’ E na o le 300 fitafita na mataala a o feinu. Na folafola atu e Ieova e na o le pau ia o tamāloloa o le a faatoʻilaloina fitafita Mitiana e 135,000.

I lenā pō, na faapea atu ai Ieova iā Kitiona: ʻO le taimi lenei e osofaʻi ai loa tagata Mitiana.’ Ona avatu lea e Kitiona i lana ʻautau o pū ma fagu tetele sa iai sulu i totonu. Na fai atu Kitiona iā i latou: ʻIa outou vāai mai iā te aʻu ma faataʻitaʻi mea ou te faia.’ Na ili e Kitiona le pū, tataʻe le fagu, uu i luga lana sulu ma alaga leotele: ʻO le pelu a Ieova ma Kitiona.’ O gaoioiga foʻi na sa faia e lana ʻautau e toʻa 300. Na matuā fefefe fitafita Mitiana ma sosola ese. O lo latou lē mautinoa o le mea ua tupu, na toe osofaʻi ai e le tasi le isi. Ua faaalia mai i inei, na toe fesoasoani foʻi Ieova i tagata Isaraelu e faatoʻilalo o latou fili.