Ngekuhamba kwesikhatsi, ema-Israyeli aphindze ahlubuka kuJehova acala kukhonta labanye bonkulunkulu. Kwaphela iminyaka lesikhombisa emaMidiyani eba imfuyo yema-Israyeli kanye nalebebakulimile. Ema-Israyeli bekabhaca etintsabeni nasemigedzeni nakabalekela emaMidiyani. Ancenga Jehova kutsi awasindzise. Ngako Jehova watfumela ingilosi kulelinye lijaha lebekutsiswa nguGideyoni. Lengilosi yatsi: ‘Jehova unawe wena chawe lelinemandla.’ Gideyoni wayibuta watsi: ‘Ngingawasindzisa njani ema-Israyeli? Angisilutfo.’

Bekatawuciniseka ngani Gideyoni kutsi Jehova bekakhetse yena? Wabeka sikhumba seboya bemvu emhlabatsini wase utsi kuJehova: ‘Ekuseni, nangabe ematolo atawumatsisa loboya kuphela kodvwa libala lonkhe libe lomile, ngitawubese ngiyati kutsi utawusindzisa ema-Israyeli usebentisa mine.’ Ngakusasa ekuseni, lesikhumba seboya besimanti kodvwa umhlabatsi womile. Ngelilanga lelilandzelako, Gideyoni wacela kutsi ekuseni lesikhumba kufanele some bese umhlabatsi wona uba manti. Nakwenteka loko, Gideyoni wabese uyakholwa kutsi Jehova bekakhetse yena. Wahamba nemasotja akhe kuze bayolwa nebaMidiyani.

 Jehova watsi kuGideyoni: ‘Banyenti kakhulu bantfu labanawe kutsi nginganikela bakaMidiyani esandleni sema-Israyeli. Ungasuke ucabange kutsi utisindzise ngesandla sakho. Cela nobe ngubani lowesabako abuyele ekhaya.’ Ngako emasotja langu-22 000 ajika wasala nalangu-10 000. Jehova wabese utsi: ‘Basebanyenti labantfu. Bayise emantini kuze ngikuvivinyele bona. Hamba nemadvodza lanatsa emanti ngekuwacapha ngelulwimi.’ Ngulangu 300 kuphela emadvodza lanatsa lamanti agadzile. Jehova wetsembisa kutsi lamadvodza lambalwa ngiwo lebekawuncoba lemphi yemaMididyani lebeyinemasotja langu-135 000.

Ngalobo busuku, Jehova watsi kuGideyoni: ‘Vuka uhlasele bakaMidiyani.’ Gideyoni wanika emasotja akhe timphondvo nemajeke lebekanetibani ngekhatsi. Wawatjela watsi: ‘Bukani mine, bese nenta njengobe ngenta.’ Gideyoni washaya luphondvo lwakhe, waphihlita nalelijeke lakhe, aphetse nesibani sakhe, wamemeta watsi: ‘Inkemba yaJehova neyaGideyoni!’ Onkhe nalamadvodza langu-300 lebekahamba nawo enta lokufanako. EmaMidiyani etfuka abalekela etindzaweni letehlukahlukene. Kuleso siphitsiphitsi, emaMidiyani acala kubulalana odvwana. Nalapho futsi, Jehova wachubeka awasita ema-Israyeli kutsi ancobe titsa tawo.