Tau Israel saụ tawe masatia si Yehuwa kụ něněmbah manga dewa. Karěngụe pitu taung, tau Midian měnděndusa panen tau Israel dingangu mětẹ̌tako binatang i sire. Tadeạu aman bọu tau Midian, tau Israel nẹ̌kěmbuni su liang dingangu su wul᷊udẹ̌. I sire nẹ̌dorong tadeạu Yehuwa mẹ̌tul᷊ung si sire. Hakị u ene, Yehuwa něngoro malaekatẹ̌ pakoạ sarang sěngkatau umbaseng arenge Gideon. Malaekatẹ̌ ene nẹ̌bera, ’Yehuwa němile si kau. I kau sarung makoạ prajuritẹ̌ jago mẹ̌pěrang.’ Gideon naul᷊ị, ’Kerea carane iạ makasal᷊amatẹ̌ Israel? Iạ bal᷊inẹ taumata penting.’

Kerea tadeạu i Gideon mangimang i Yehuwa seng němile si sie? I sie nẹ̌taho hekạ wol su ěntana kụ naul᷊ị si Yehuwa, ’Mạeng dịěllo mal᷊ukadẹ̌ hekạ ini maholo ual᷊ingu namuhẹ̌ katewe ěntana tatapẹ̌ mamara, ene mangal᷊ene i Kau mapulu iạ mẹ̌tul᷊ung tau Israel.’ Dịěllone mal᷊ukadẹ̌, hekạ ene naholo katewe ěntanane mamara! Bọu ene, Gideon nẹ̌dorong tadeạu dịěllone hekạ ene mamara katewe ěntanane manantạ. Dịěllone ene  nariadi. I Gideon nangimang i Yehuwa seng němile si sie. Hakị u ene, i sie něngomol᷊ẹ̌ prajuritẹ̌ gunang lumawang Midian.

Yehuwa naul᷊ị si Gideon, ’Iạ sarung měkoạ tau Israel makauntung. Katewe ual᷊ingu piạ lawọ prajuritẹ̌, i kamene sarung mẹ̌pikirẹ̌ i kamene nakauntung ual᷊ingu katatoghasi kamene. Pakapul᷊ẹe manga prajuritẹ̌ apang matakụ.’ Hakị u ene, piạ 22.000 napul᷊ẹ, kụ nal᷊ěmbe 10.000. Bọu ene Yehuwa nẹ̌bera, ’Bědang tumanịu mal᷊awọ prajuritu. Oroko i sire sarang sal᷊ụ kụ pěnginung. Pilẹe i sire apang něnginung apidu tatapẹ̌ mědẹ̌dariagạ.’ Kětạeng 300 prajuritẹ̌ někoạ kerene. Yehuwa nẹ̌diandi i sire sarung makauntung lumawang 135.000 prajuritu Midian.

Hěbi ene, Yehuwa nẹ̌bera si Gideon, ’Ini seng tempone lumawang tau Midian!’ Gideon něgělị su prajurite terompet bọu sunge dingangu wěnsadẹ̌ gěguwạ kụ su ral᷊unge piạ oborẹ̌. I sie naul᷊ị, ’Pěmanda si siạ, kụ koạ kere apa takụ koateng.’ Gideon něniụ těrompetẹ̌, něměka wěnsadẹ̌, kụ něhengkẹ oborẹ̌, bọu ene němansagẹ̌, ’Pedang i Yehuwa dingangi Gideon!’ Bọu ene, 300 prajurite lai někoạ kerene. Tau Midian natakụ kụ nẹ̌kal᷊iaesẹ̌ nahuntal᷊ang. Ual᷊ingu situasine sěbạe kacau, i sire nẹ̌papate. Yehuwa nẹ̌tul᷊ung tau Israel nakakala sědụ i sire.