Yange Mbaiserael shi va de u civir Yehova hide lu civir mbaaôndo mbaaiev. Nahan Yehova de Mbamidian ii Mbaiserael ilev shi vihi ve iyiav. Ve er kwagh ne a Mbaiserael kuma anyom ataankarahar. Mbaiserael yange ve yevese Mbamidian ve za yer ken ubar kua sha iwo. Nahan ve va zamber a Yehova ér a yima ve. Yehova maa tindi ortyom hen gumor ugen, iti na ér Gidion. Ortyom la za kaa a na ér: ‘Yehova tsua u ér we u lu torutya u ageegh.’ Gidion hide pine ér: ‘Me er nan ve me yima Iserael? M ngu kwagh ga.’

Gidion una er nan ve una fa ér mimi je Yehova tsua unu? Yange ver aive a iyôngo hen inya, maa kaa a Yehova ér: ‘Kper pepe, aluer m nenge avure gba sha aive a iyôngo ne tseegh, a gba hen inya ga yô, me fa je mer u soo wer m yima Iserael.’ Sev mbu aven yô, Gidion nenge avure gba sha aive a iyôngo la tseegh, a gba hen inya ga! Kpa shi Gidion er msen ér kper pepe avure a gba hen inya, kpa sha aive la yô, a de gbe ga. Kwagh ne eren yô, Gidion mase nan jighjigh ér Yehova tsua un. Tsô a kohol ushoja nav sha u za nôngon ityav a Mbamidian.

Yehova kaa a Gidion ér: ‘Me na Mbaiserael vea hemba ityav. Kpa er u lu a shoja kpishi yô, alaghga ne va hen ner ka sha  tahav enev ne hemba ityav mbira ye. Nahan yô, ôr hanma orshoja u i cier nan iyol u zan ityav cii nana hide nana yem ken ya.’ Tsô ushoja 22,000 hide yem ken ya, mase shin ushoja 10,000. Kpa Yehova kaa ér: ‘Ushoja shi her ngee yum. Yô va a ve hen kpe ifi, nahan kaa hanmô ve nana ma mngerem. I lu mba vea lu man mngerem moughon kenger kera sha ci u mbaihyomov la tseegh ve mase shin ye.’ Yange lu ushoja 300 tseegh lu man mngerem shi moughon kenger kera ye. Yehova maa tôndo zwa ér iorov kpuaa mbara vea hemba ushoja mba Midian 135,000 ityav.

Sha iyange la tugh, Yehova kaa a Gidion ér: ‘Mough ase hegen za ta ityav sha Mbamidian!’ Gidion yange na ior nav ikyor i tôngon kua mtem, shi hanma ityegh lu a ikyagh-toho shimi, i a va tsar usu a mi yô. Gidion kaa a ve ér: ‘Nenge nen kwagh u me er yô, nahan ne kpa er nen nahan vough.’ Gidion maa tôngo korough nagh, shi hembe ityegh nagh, maa tsar usu sha ikyagh-toho na, kende a mi sha, lu jingir, yôôn genger genger ér: ‘Sanker u Yehova man u Gidion!’ Maa ushoja nav mba 300 mbara cii er nahan. Kwagh ne cier Mbamidian iyol, maa ve num kpugh, or kera za hwange a or ga. Er ve sarem ve hingir wue wue yô, ve hide ve wua ayol a ve ker. Kwa ne kpa, Yehova wase Mbaiserael hemba mbaihyomov vev ityav.