Pati pajumpha nyengu, Ayisraele anguleka so kuvwiya Yehova ndipu angwamba kusopa achiuta aboza. Kwa vyaka 7, Amidiyani abanga viŵetu va Ayisraele ndi kunanga mbewu zawu. Ayisraele abisamanga muzimphaku kweniso mumapiri chifukwa chakuthaŵa Amidiyani. Yiwu angupempha Yehova kuti waŵataski. Mwaviyo, Yehova wangutuma mungelu kuti waluti ku munyamata munyaki zina laki Gideoni. Mungelu yo wangukamba kuti: ‘Yehova wasankha yiwi kuti uje msilikali wanthazi.’ Gideoni wangufumba kuti: ‘Kumbi ndingaŵataska wuli Ayisraele? Nde yani ini?’

Kumbi Gideoni watingi waziŵengi wuli kuti Yehova wamusankha? Iyu wanguŵika thonji pasi ndipu wangukambiya Yehova kuti: ‘Asani mawa ndi mulenji thonji ili lazizumbwa kweni pasi pazija pakumira, ndazamuziŵa kuti mukhumba kuti ini nditaski Ayisraele.’ Mawa laki ndi mulenji, thonji lo linguzumbwa kweni pasi penga pakumira! Gideoni wangupempha so kuti mawa laki ndi mulenji, thonji lizije lakumira kweni pasi pazije mtika. Ivi vati vachitika, Gideoni wanguziŵa kuti Yehova wamusankha nadi. Mwaviyo, iyu wanguwunganiska asilikali ŵaki kuti akachiti nkhondu ndi Amidiyani.

 Yehova wangukambiya Gideoni kuti: ‘Ndiŵawovyengi Ayisraele kuti aphari nkhondu. Kweni chifukwa chakuti we ndi asilikali anandi, ungaziŵanaŵananga kuti mwaphara mwija nkhondu. Kambiya weyosi yo we ndi mantha kuti wawere kunyumba.’ Mwaviyo, asilikali 22 sawuzandi anguwere kunyumba ndipu panguja asilikali 10 sawuzandi. Pavuli paki, Yehova wanguti: ‘Asilikali yaŵa ŵeche anandi. Uluti nawu kumusinji ndipu ukaŵakambiyi kuti amwi maji. Asilikali wo amuleka kuvunama pakumwa maji, ndiwu ukasankhi.’ Asilikali 300 pe ndiwu anguchita viyo. Yehova wangulayizga kuti anthurumi amanavi ŵenaŵa ndiwu amuthereska asilikali 135 sawuzandi a Amidiyani.

Mu usiku wenuwu, Yehova wangukambiya Gideoni kuti: ‘Sonu nyengu yakwana yakuti muthereski Amidiyani!’ Gideoni wangupasa mbata anthurumi wo wenga nawu kweniso viŵiya vikuluvikulu vo anguŵikamu malimbuni. Iyu wanguŵakambiya kuti: ‘Muwonengi ini ndipu muchiti nge mo ndichitiyengi.’ Gideoni wanguliza mbata ndipu wanguphwanya chiŵiya cho wenga nachu, wangusoska limbuni laki ndipu wangudaniliza kuti: ‘Lipanga laku Yehova ndi laku Gideoni!’ Anthurumi 300 wo ŵenga nayu nawuso anguchita viyo. Amidiyani anguchita mantha ndipu angwamba kutchimbiriya uku ndi uku. Chifukwa chakutimbanyizgika, angwamba kubayana ŵijaŵija. Yapa napu, Yehova wanguwovya Ayisraele kuthereska arwani ŵawu.