Mukuya kwachiindi, maIsrayeli bakaleka kutobelezya milawu yaJehova alimwi bakatalika kukomba baleza bakubeja. Kwaminyaka iili 7, bantu bakuMidiyani bakali kubba lubono lwamaIsrayeli akunyonyoona zilyo zyabo. MaIsrayeli bakali kuyuba mumpako amuzilundu kuti achije maMidiyani. Mpawo bakakumbila Jehova kuti abavune. Nkinkaako, Jehova wakatuma mungelo wakwe kuti aye kumuntu uutegwa Gidiyoni. Mungelo wakabuzya Gidiyoni kuti: ‘Jehova wasala nduwe kuti ube mwaalumi singuzu.’ Mpawo Gidiyoni wakabuzya kuti: ‘Ndilaavuna biyeni maIsrayeli? Ndimuniini.’

Gidiyoni wakaziba biyeni kuti wakali wasalwa aJehova? Wakabikka boya bwambelele ansi akubuzya Jehova kuti: ‘Nindabona kuti aboya kuli lume pesi aansi kakuli kuyumu, njooziba choonzyo kuti ulaafutula maIsrayeli.’ Nibwakacha kuseni, wakajana boya buzwide lume alimwi ansi kwakali kuyumu. Mpawo Gidiyoni wakakumbila kuti buzuba butobela azoojane boya kabuli buyumu pesi kuzootete nyika. Nizyakachitika eezi, Gidiyoni wakasyoma kuti wakasalwa aJehova. Wakabungania basilumamba bakwe kuti bakalwane abantu bakuMidiyani.

Jehova wakabuzya Gidiyoni kuti: ‘Ndiyoochita kuti maIsrayeli bazunde. Pesi basilumamba mbolaabo mbiingi  loko, kuti mwazunda mulakonzya kuyeeya kuti mwazunda munguzu zyanu. Buzya baalumi mbolaabo kuti kufumbwa uyoowede abweede kung’anda.’ Kuzwa waawo, basilumamba bali 22 000 bakabweeda kung’anda pesi bali 10 000 bakasyaala. Jehova wakati: ‘Basilumamba bako bachili biingi. Batole kukalonga ubabuzye kuti banywe maanzi. Usale aabo bayoonywa maanzi kabateka amaboko kumwi kabalanga basinkondonyina.’ Basilumamba bali 300 mbabo bakanywa maanzi kumwi kabalanga basinkondonyina. Jehova wakasyomezya kuti basilumamba aabo bache mbabo bakali kuyoozunda basilumamba bakuMidiyani bali 135 000.

Mubusiku oobo, Jehova wakabuzya Gidiyoni kuti: ‘Yinka ukalwane abasilumamba bakuMidiyani.’ Gidiyoni wakapa basilumamba bakwe myeembo amalampi akali munkomesi mpati. Wakababuzya kuti: ‘Amulange ndime, mukachite mbundichita.’ Gidiyoni wakalizya mweembo wakwe, wapwaya nkomesi yakwe akumunika lampi lyakwe mpawo wakoompolola kati: ‘Panga lyaJehova alyaGidiyoni!’ Boonse basilumamba bakwe bali 300 bakachita mbuli nguwe. Basilumamba bakuMidiyani bakayoowa akutalika kuchijila kumasena asiyene-siyene. Bakanyonganisigwa zyakuti bakasaanguna kulwana chabo-chabo. Muchiindi eechi Jehova wakagwasya maIsrayeli kuti azunde basinkondonyina.