Titaxtulh kilhtamaku, israelitas makgxtakgparakgolh Jehová, chu tsukukgolh kakninanikgo nixaxlikana dioses. Akgtujun kata, madianitas xkalakgakgalhankgo x’animaleskan israelitas chu xmalakgsputukgo xtachanankan. Xlakata nitu xkatlawanika, israelitas xtatsekgkgo klhuku chu kkasipijni. Alistalh tasaskinikgolh Jehová xkalakgmaxtulh. Wa xlakata Jehová malakgachalh chatum ángel xlakata xwanilh chatum kgawasa nema xwanikan Gedeón: “Jehová laksaknitan xlakata chatum tliwakga soldado nawana”. Gedeón kgalhskininalh: “Akit nitu klitaxtu, ¿la tlan naklakgmaxtu Israel?”.

Gedeón liwana xkatsiputun komo Jehová xlaksaknit. ¿Tuku tlawalh? Wililh aktsu lhakgat xla lana kkatiyatni chu wanilh Jehová: “Komo chali tsisa lana nachuwa monkganat, pero nitu stajnit tiyat, nakkatsi pi wix kilaksanita xlakata naklakgmaxtu Israel”. Lichali, lana lu chitwa xwanit, pero tiyat ni. Gedeón skinilh Jehová pi lichali, lana xaskakni xtamakgxtakgli chu tiyat xkakawalh. Tuku Gedeón skilh kgantaxtupa. Gedeón chuna katsilh pi Jehová xlaksaknit. Wa xlakata kamamakxtumilh xsoldados chu alh katalachipa madianitas.

 Jehová wanilh Gedeón: “Nakkamakgtaya israelitas natlajanankgo. Pero komo kgalhikgo lhuwa soldados, max nalakpuwankgo pi x’akstukan tlajanankgolh. Tlakg tlan nakawaniya tiku pekuamakgo kataspitparakgolh kxchikkan”. Wa xlakata 22,000 soldados taspitparakgolh kxchikkan chu 10,000 tamakgxtakgkgolh. Alistalh Jehová wa: “Lhuwaku soldados. Kakalipi kpuxkga chu kakawani nawakgo chuchut. Kajwatiya katatamakgxtakgti tiku nawakgo chuchut chu na skgalalh natawilakgo ni naminkgo xtalatlawanakan”. Kajwatiya 300 lakchixkuwin skgalalh xwilakgolh akxni xwamakgo chuchut. Jehová wa pi uma ni lhuwa soldados x’ama katlajakgo 135,000 soldados madianitas.

Ama katsisni Jehová wanilh Gedeón: “Uku kilhtamaku natalatlawayatit madianitas”. Gedeón kamaxkilh xsoldados akgalokgot chu xalu niku xtanuma tuku xlimakgskgokan chu kawanilh: “Kaki’akxilhtit chu katlawatit tuku akit naktlawa”. Gedeón mamakasanilh x’akgalokgot, pakgli xalu chu matsuwilh xmakgskgot chu pixlanka wa: “Xʼespada Jehová chu xla Gedeón”. Chu 300 chixkuwin nachuna tlawakgolh. Madianitas lu xpekuamakgo, chu ni xkatsikgo niku x’ankgo. Chu xlakata lakgawani xlamakgo, x’akstukan tsukukgolh latalatlawakgo. Amakgtum, Jehová kamakgtayapa israelitas nakatlajakgo xtalatlawanakan.