Obwire bukahika, Abaisareri bajemera Yahwe kandi batandika kuramya baruhanga ab’ebisuba. Abamidiani bakamara emyaka musanju nibaiba ebisoro by’Abaisareri kandi nibahwerekereza emisiri yabo. Kusobora kwerinda Abamidiani, Abaisareri baikaraga beserekere omu bwingira n’omu nsozi. Bakesengereza Yahwe kubajuna. Yahwe akacwamu kutuma maraika agende abaze n’omusigazi arukwetwa Gideoni. Maraika onu akamugambira ati: ‘Yahwe akukomeremu kuba murwani ow’amaani.’ Gideoni akamukaguza ati: ‘Ninsobora nta kujuna Isareri? Tinyine omugaso gwona.’

Kiki ekyakukonyire Gideoni kunanuka ngu Yahwe akaba amukomere kurwanisa Abamidiani? Akakwata ebyoya by’entaama yabita hansi yagambira Yahwe ati: ‘Nyenkyakara obundasanga ebyoya binu bijwire orume baitu itaka lyomere, obu nubwo ndamanya ngu nogonza njune Isareri.’ Obwire obu bwakiire, ebyoya bikaba biijwire orume baitu itaka lyomere! Gideoni akongera yasaba Yahwe ngu omurundi gunu ebyoya bitajuba baitu itaka niryo lijube. Kinu nakyo obukyabaireho, Gideoni akakigumya ngu mali Yahwe akaba amukomeremu. Akasorooza abaserikale abakaba nagenda kukozesa kurwanisa Abamidiani.

 Yahwe akagambira Gideoni ati: ‘Ningenda kuha Abaisareri obusinguzi. Baitu nosobora kutekereza ngu osingire obulemu habwokuba oine abaserikale baingi. Gambira buli muntu wena anyakutinire ngu agarukeyo omu ka ye.’ Abaserikale 22,000 bakagaruka omu maka gaabo, kandi hasigaraho 10,000. Yahwe akongera yamugambira ati: ‘Abo nabo abasigaireho baingi muno. Batwale ha kyambu obaragire kunywa amaizi. Omuntu wena aranywa amaizi namagamaga kurora omunyanzigwa nuwe orasigaza nk’omurwani.’ Abasaija 300 bonka nubo abanywire amaizi nibamagamaga kurora abanyanzigwa. Yahwe akaraganiza ngu abasaija banu nubo bonka akaba n’agenda kukozesa kusingura abaserikale ba Midiani abarukuhika 135,000.

Kiro eki, omu bwire bw’ekiro, Yahwe akagambira Gideoni ati: ‘Bunu nubwo obwire bw’okurwanisa Abamidiani!’ Gideoni akakwasa abasaija be boona engwara hamu n’ensoha enkooto baziserekeremu ebimuli by’omurro. Akabagambira ati: ‘Murole eki ndakora, nainywe nikyo kyonyini mukole.’ Gideoni akatera engwara yayasa ensoha ye, yahungyahungya ekimuli kye eky’omurro n’atokera haiguru nagamba: ‘Empirima ya Yahwe n’eya Gideoni!’ Abasaija 300 nabo nukwo bakozere. Abamidiani bakatiina muno batandika kwirukira omu mbaju zoona. Habw’okutetegereza ekirukugenda omu maiso, bakatandika kurwanisangana. Na ha murundi gunu Yahwe akakonyera Abaisareri kusingura abanyanzigwa babo.