Израильчилер Иеговага дыңнангыр эвес апарып, меге бурганнарга чүдүп эгелээн. Мадианнар чеди чыл ишти оларның мал-маганын хунаап, дүжүдүн узуткап келген. Израильчилер мадианнардан камгаланыр дээш, куйларга болгаш дагларга чаштынып турган. Олар Иеговадан дузаны чаннып дилээрге, ол Гедеон деп эр кижиже ангелин чоргузупкан. Ангел Гедеонга мынча дээн: «Иегова сени шилип алган. Сен күштүг дайынчы апаар сен». Гедеон айтырган: «Мен Израильди канчап камгалап шыдаар мен? Мен бөдүүн кижи ышкажыл мен».

Иегова ону шилип алган деп, Гедеон канчаар билип каан? Ол дүктү черге салгаш, Иеговага мынча дээн: «Эртен дүк шалыңдан өл, а долгандыр чер кургаг боор болза, Израильди камгалаар кылдыр, мени шилип алганыңны билип каар мен». Эртенинде дүк өл болган, а чер кургаг! Дараазында хүн дүк кургаг, а чер шалыңныг болзун деп, Гедеон дилээн. Шак ынчаар болган. Ынчан Гедеон Иегова ону шилип алган деп билип каан. Ол мадианнар-биле демисежир дээш, дайынчыларын чыып алган.

 Иегова Гедеонга чугаалаан: «Мен израильчилерге тиилелгени бээр мен. Ынчалза-даа дайынчыларың хөйүнден тиилелгени бодувус чедип алган бис деп бодай берип болур силер. Ынчангаш коргуп турар улусту чандырывыт». 22000 дайынчы чоруптарга, 10000 кижи артып калган. Ынчан Иегова: «Дайынчылар ам-даа хөй-дүр. Оларны сугдан ижип алыр кылдыр, дамыракче чедире бер. Сугну ижип тургаш, дайзыннар халдап келбээн бе дээш кыдыгларынче көрүп турар улусту арттырып ал» — дээн. Чүгле 300 кижи ындыг кичээнгейлиг болган. Ол каш кижи 135000 мадиан дайынчыларны тиилеп алыр деп, Иегова аазаан.

Ол дүне Иегова Гедеонга мынча дээн: «Мадианнарже халдаар үе келди!» Гедеон дайынчы бүрүзүнге мыйыстыг эдискилерни болгаш улуг доңгаларны тутсуп каан. Ол доңгаларның иштинге факелдер турган. Гедеон улузунга: «Мен ышкаш шак ынчаар кылыңар» — дээн. Гедеон эдискилерни этсип, доңгаларны буза шапкаш, факели-биле чайбышаан: «Иегованың болгаш Гедеоннуң хылыжы!» — деп алгырыпкан. Шупту 300 дайынчы база шак ынчаар кылган. Мадианнар кортканындан чүк бүрүзүнче халчып чорупкан. Олар дүвүрээнинден бот-боттарын өлүрүп эгелээн. Ынчаар Иегова израильчилерге дайзыннарын удуп алырынга база катап дузалаан.