Nga u ya ha tshifhinga, Vhaisiraele vha dovha vha ṱutshela Yehova nahone vha thoma u rabela midzimu ya mazwifhi. Lwa miṅwaha ya sumbe, Vhamidiani vho tswa zwifuwo zwa Vhaisiraele na u tshinyadza zwe vha lima. U itela u shavha Vhamidiani, Vhaisiraele vha dzumbama mabakoni na dzithavhani. Vha humbela Yehova uri a vha thuse. Yehova a ruma muruṅwa kha muṱhannga ane a pfi Gideoni. Muruṅwa a ri: ‘Yehova o khetha inwi uri ni vhe mudzia-mmbi wa maanḓa.’ Gideoni a vhudzisa a ri: ‘Ndi ḓo tshidza hani Isiraele? Ndi muthu zwawe.’

Gideoni o vha a tshi ḓo zwi ḓivha hani uri Yehova o khetha ene? O vhea nguvho ya vhukuse fhasi nahone a ri kha Yehova: ‘Arali nga matsheloni ino nguvho ya ṋukala fhedzi fhasi ho oma, ndi ḓo zwi ḓivha uri u khou ṱoḓa ndi tshi tshidza Isiraele.’ Nga matsheloni, nguvho yo vha yo ṋukala nahone fhasi ho oma! Fhedzi Gideoni a humbela uri nga matsheloni a tevhelaho nguvho i ome nahone fhasi hu ṋukale. Musi zwenezwo zwi tshi itea, Gideoni a tenda uri Yehova o mu khetha. A kuvhanganya maswole u itela u yo u lwa na Vhamidiani.

 Yehova a vhudza Gideoni a ri: ‘Ndi ḓo ita uri Vhaisiraele vha kunde. Fhedzi nga ṅwambo wa uri ni na maswole manzhi, ni ḓo humbula uri no kunda nndwani nga vhoinwi vhaṋe. Vhudzani vhoṱhe vhane vha khou ofha uri vha humele hayani.’ Maswole a 22 000 a vhuyelela hayani nahone ha sala a 10 000. Nga murahu Yehova a ri: ‘Hu tshee ho sala maswole manzhi. Vha iseni mulamboni nahone ni vha vhudze uri vha nwe maḓi. Ni sale fhedzi na vhanna vhane vha nwa maḓi vho sedza arali maswina a tshi khou ḓa.’ Ndi vhanna vha 300 fhedzi vhe vha dzula vho fhaṱuwa musi vha tshi khou nwa maḓi. Yehova a fulufhedzisa uri vhenevha vhanna vha si gathi vha ḓo kunda maswole a Vhamidiani a 135 000.

Vhusikuni honoho, Yehova a vhudza Gideoni a ri: ‘Tshifhinga tsha u vutshela Vhamidiani tsho swika!’ Gideoni a ṋea vhanna vhawe phalaphala na mvuvhelo khulwane dze ha dzumbiwa mbone khadzo. A vha vhudza a ri: ‘Ni sedze nṋe nahone ni ite zwoṱhe zwine nda ḓo zwi ita.’ Gideoni a lidza phalaphala yawe, a pwasha mvuvhelo yawe, a dzungudza luvhone nahone a vhidzelela a ri: ‘Banga ḽa Yehova na ḽa Gideoni!’ Vhanna vhoṱhe vha 300 vha ita zwi fanaho. Vhamidiani vha dzhenwa nga nyofho nahone vha shavhela thungo dzoṱhe vho ḓaḓa. Kha ḽeneḽo bonyongo, vha thoma u lwa nga tshavho. Yehova o dovha hafhu a thusa Vhaisiraele u kunda maswina avho.