Nuuvira okathi, aIsarayeli yaahihiya omwiiwelela Yehova ni khupacerya waakokhorela amuluku eethiru. Mwa iyaakha 7, atthu a oMadiyani yaaniwiiyerya aIsarayeli inama saya ni yaanihonona imatta saya. Wira ahiiviwe, aIsarayeli yaahaana otthyawela mmakhukuni ni omwaako. Nto yaahimuxonttela Yehova wira owoopole. Yehova aahiruma nlaikha nawe okumana ni mmiravo aitthaniwa Gedeyoni. Nlaikha nlo naahimuleela wira: ‘Yehova ohoothanlani nyuwo, wira mukhale nakhotto oowerya’. Gedeyoni aahikoha so: ‘Kinrowa owerya sai owoopola aIsarayeli? Miyo ka pani?’

Nto Gedeyoni aarowa osuwela sai wira aahithanliwa ni Yehova? Owo aahaatalela esapala vathi ni aahimuleela Yehova wira: ‘Meelo voosiisu, akhala wira esapala eyo enoonaana masi etthaya khuuma, miyo kinoosuwela wira muniphavela wira kiwoopole aIsarayeli’. Mmeeloni mwaya voosiisu, esapala yaahinaana ni etthaya yaahuuma. Nto Gedeyoni aahinvekela-tho Yehova wira mmeeloni mwaya esapala ele yuume masi etthaya enaane. Nuumala eyo wiiraneya, Gedeyoni aahikupali wira Yehova aahimuthanla. Owo aahaathukumanya anakhotto awe wira yawane ni anakhotto a oMadiyani.

 Yehova aahimuleela Gedeyoni wira: ‘Miyo kinimwaakhaliherya aIsarayeli wira yaaxintte awanani aya. Masi okhala wira anakhotto a wIsarayeli khareere, nyuwo pooti wuupuwelaka wira munooxintta ni ikuru sanyu. Nto mwaaleele atthu otheene wira ale anoova ahaana ohokolowela owaani’. Nto anakhotto 22.000 yaahitthikela owaani, masi 10.000 yaahihala. Yehova aahihimya-tho wira: ‘Nlelo anakhotto awo khareere. Mwaaroihe omuro ni mwaarume owurya maasi. Mwaathanle paahi ale anaaweha-weha awanani aya okathi aniwurya aya’. Anakhotto 300 paahi ti yaaweha-weha okathi yaawurya aya. Yehova aahileiherya wira anakhotto ala vakhaani yanwerya waaxintta anakhotto 135.000 a oMadiyani.

Ohiyu ene yoole, Yehova aahimuleela Gedeyoni wira: ‘Vano woophiya okathi woowaatuphela anakhotto a oMadiyani!’ Gedeyoni aahinvaha khula mulopwana nlope ni murinki muulupale waarina muthuko, ni aahihimya wira: ‘Mukiweheke miyo, ni mwiireke ntoko siniira aka’. Gedeyoni aahoopa nlope, aahipwexa murinki, aahikuxa muthuko, ni aahikhuwela iiraka: ‘Ekatana ya Yehova ni ya Gedeyoni!’ Nto anakhotto ale 300 yaahipaka etthu emosaru. Anakhotto a oMadiyani yaahoova ni yaahitthyawa khula mmosa arowaka ephiro awe. Axankale ene, awo yaahipacerya otuphelana yaaworu. Nto Yehova aahitthikela-tho waakhaliherya aIsarayeli waaxintta awanani aya.