Pali papite ndaŵi, Ayisalayeli ŵalesile kulambila Yehofa ni ŵatandite kulambila milungu jaunami. M’yoyo kwa yaka 7, Amidiyani ŵajiŵaga yilango soni konanga mbeju sya Ayisalayeli. Pakusaka kwatila Amidiyaniŵa, Ayisalayeli ŵajuŵaga m’matumbi. Kaneko Ayisalayeli ŵam’ŵendile Yehofa kuti ŵakulupusye. M’yoyo Yehofa ŵatumisye lilayika kwa mnyamata jwine jwakolanjidwa Gidiyoni. Lilayikalyo lyamsalile kuti, ‘Yehofa amsagwile mmwejo kuti m’we msilikali jwamacili.’ Gidiyoni jwawusisye kuti, ‘Ana une mpaka ngulupusye camtuli Ayisalayeli? Une ndili mundu jwangali mate.’

Ana Gidiyoni ŵasimicisye camtuli kuti Yehofa amsagwile? Jwalakwe jwaŵisile manyunya pasi ni jwam’ŵendile Yehofa kuti, ‘Kundaŵi, naga manyunya ciganyoŵe ni mangame, nambo pasipa ni kuŵa pejumu, cinjimanyilila kuti wawojo akusaka kuti ngulupusye Ayisalayeli.’ Kundaŵi kwa lisiku lyakuyicisya, manyunya gala ganyoŵile nambo pasipo paliji pejumu. Gidiyoni jwaŵendilesoni kuti kundaŵi kwa lisiku lyakuyicisya manyunya gaŵe gejumu nambo pasi paŵe penyoŵe. Yili yitendekwe, Gidiyoni jwakulupilile kuti Yehofa amsagwile. M’yoyo jwalakwe jwasongenye asilikali kuti akamenyane ni Amidiyani.

 Yehofa ŵamsalile Gidiyoni kuti, ‘Cinjakamucisya Ayisalayeli kupunda ngondo. Nambo ligongo lyakuti mkwete asilikali ŵajinji, yicimtendekasya ganisya kuti mpundile ngondojo ni macili genu. Mumsalile jwalijose jwakutenda woga kuti awujile kumangwakwe.’ Ni asilikali 22,000 ŵawujile kumangwawo, ni kusigala 10,000. Kaneko Yehofa ŵatite, ‘Atupilesoni asilikaliwo. Mjawule nawo ku kasulo, ni mkasalile kuti akamwe mesi.’ Mkamjigale jwalijose jucakamweje mesi ali mkulola acimmagongo. Asilikali 300pe ni ŵaŵamwele mesi ali mkulola acimmagongo. Yehofa ŵatesile cilanga kwa acalume ŵamnonoŵa kuti ni ŵacakagomece asilikali ŵa Amidiyani ŵakwana 135,000.

Cilo ca lisiku lilyolyo, Yehofa ŵamsalile Gidiyoni kuti, ‘Sano jikwanile ndaŵi jakuti mkagomece Amidiyani!’ Gidiyoni ŵapele acalume ŵakwe sengo soni milulo jekulungwa ali aŵisile yakumulicila mkati mwakwe. Jwalakwe ŵasalile jemanjajo kuti, ‘Andolecesyeje, soni atendeje yingutendayi.’ Gidiyoni ŵajimbile sengo, ŵakasile mlulo wakwe, ŵajendesyaga mwinani cakumulicila cakwe, soni ŵagumisile kuti, ‘Upanga wa Yehofa soni wa Gidiyoni!’ Soni acalume ŵakwe 300 ŵala ŵatendaga m’yoyo. Amidiyani ŵatesile woga ni ŵagambaga kutilila kulikose. M’yoyo ligongo lyakusokonecela mtwe, jemanjajo ŵawulaganaga jwine ni mjakwe. Yehofa ŵakamucisyesoni Ayisalayeli gomeka acimmagongo ŵawo.