Kusa, aYisaraere ambu pekafuo Yekova ki tona kaa iriso kungbo ambori. Tipa agarã saba, aMidiano aadĩ ga aYisaraere anya na kini gbarasipa gayo rukuruku ahe. Tipa ka zubo be aMidiano, aYisaraere anaagbuka rogo asiimbia na rii abaagangara yo. I azungodi Yekova ko batasi yo. Sidu, Yekova akedi maraika fuo gu paranga kumba nangia Gidiona. Maraika aya fuko wẽ: ‘Yekova sia ro mo duni kere nyanyaki basovura.’ Gidiona asanahe nga: ‘Wai gu rengbe mi ka batasa Yisaraere? Kungbo he gbua nga mi.’

Wai du Gidiona arengbe ka ino gupai nga Yekova du siako? Ko amoi mange kandoro sande na ki ya fu Yekova: ‘Ka ndomo ti kina kurii gi mange kandoro re sa wiso ono sende kidu ni ugu he pati ni, si mi nika ino gupai ti ni nga mo naida mi batasi Yisaraere.’ Fuo girorago, gu mange kandoro re aima zirã be ndomo ono sende kidu ni kina uguhe pati ni! Ono fuo gure, Gidiona asanahe nga gu wiso ngbefuo ho gu mange kandoro re du ni uguhe ono sende ki zirĩ pati ni be ndomo. Fuo gipai re mangi, Gidiona adakuti gupai niyangaraha nga Yekova ima siako. Ko adungura gako abanzengere i so vura kuti aMidiano.

 Yekova aya fu Gidiona: ‘Mi nika fu diabese fu Yisaraere. Mbiko padu abanzengere bero ni dunguyo, mo ima rengba ka berã gupai nga mo du dibe gu vura re nitiro. Mo ya fu agu aboro nagunde wẽ i ga ku kporo yo.’ Sidu, abanzengere 22,000 aga ku kporo yo na aguyo nanye adu nga 10,000. Yekova ki ya berewe: ‘Abanzengere kindi ni dunguyo. Mo ndu na yo ku dio ki ya fuyo i mbiri ime. Mo di kina aguyo nata mbira ime kini ngereke tipa avurayo.’ Bange aboro gbua 300 naangera patiyo ho i aambira ime ni. Yekova akidohe nga gi bete akumba re du nika diabe agu abanzengere nga ga Midiana yo bangeyo adu nga 135,000.

Rogo gu yuru re, Yekova aya fu Gidiona: ‘Gere nga regbo awere tipa mo zubo aMidiano!’ Gidiona afu ambanya gbiati kikindigi arunge naadu na tigitigi awe vuruhe yo fu gako akumba. Ko aya fuyo wẽ: ‘Oni bi re na ki mangi kina gupai teketeke mi amangaha.’ Gidiona avudi gako mbanya, ki ta vuro gako runge, ki ya gako we kuari na kini ta ngbako nga: ‘Gu basape nga ga Yekova na ga Gidiona!’ Agu akumba naadu 300 re amangi kina gu bangisapai re. AMidiano agude ni kerehe na i kini otoko bau rogo aba dũ. Ho i aamanga ni mbangirimbangiri i atona ka zubo tiyo nitiyo. Yekova aundo aYisaraere berewe i dibe avurayo.