Môt éziñe ya ayoñ Israël a mbe a to jôé na Elkana. A mbe a bili binga bebaé, Hanna ba Peninna. Ve a mbe a dañe nye’e Hanna. Peninna a mbe a kpwe’ele Hanna éyoñ ése amu a nji be a bili mon. Mbu ôse, Elkana a mbe a kele’e nda bôte jé e tabernacle ya Shilo, na be ke kañe Zambe. Môs éziñ, be too Shilo, nde Elkana a nga yene na, Hanna, édiñe jé, ja wô’ô ébien éngôngol. Nde a nga jô nye na: ‘Te yône ndô’é. Ja’a ô nji bi mon, ô bili ma. Ma nye’e wo.’

Mvuse ya valé, Hanna a nga ye’elane Yéhôva. A mbe a ye’elan a yônôk. A nga jô Yéhôva na: ‘Nge ô ve ma mona fam, ma ye dasé wo nye, a a ye kañe wo ényiñe jé ése.’

Éyoñe Beta Pretre Éli a nga yene Hanna a yônôk, a nga buni na, a so’o meyok. Ve Hanna a nga jô nye na: ‘Teké’é a tate wom, me nji so’o meyok. Jam éziñe da taé ma nlem, nde ma kate Yéhôva.’ Nde Éli a nga sili nye njaman a jô’ô na: ‘Yéhôva a va’a te wo jôme wo yi.’ Ane Hanna a nga bulane nda jé, nlem ô bôô nye si. Mvuse mbu wua, a nga biaé mona fam, a yôlé nye na Samuel. Hanna a nga yiane wô’ô abui mevak nga?

 Hanna a nji vuane ngaka’a a nga bo Yéhôva. Nné ane a nga tyili Samuel mebé, nde a nga ke nye li’i tabernacle. A nga jô Éli na: ‘Ajô ya mone nyi, nde me nga ye’elane de Yéhôva. Ma dasé Nye nye.’ Elkana ba Hanna be mbe be kele’e jome Samuel mbu ôse, be kele’e fe nye ve mfefé ndombo. Yéhôva a nga beta ve Hanna bobefam belal a bobebinga bebaé.