Nuu ko hi shi yɛ Israel ni atsɛɔ lɛ Elkana. Nuu nɛɛ yɛ ŋamɛi enyɔ. Atsɛɔ amɛ Hana kɛ Penina. Shi Elkana sumɔɔ Hana fe Penina. Penina yɛ bii pii, shi Hana bɛ bi. No hewɔ lɛ, Penina yeɔ ehe fɛo be fɛɛ be. Daa afi lɛ, Elkana kɛ eweku lɛ yaa sɔlemɔ buu lɛ yɛ Shilo koni amɛyajá Yehowa. Be ko be ni amɛtee lɛ, ena akɛ esuɔlɔ Hana bɛ miishɛɛ. No hewɔ lɛ, ekɛɛ lɛ akɛ: ‘Hana, kaafo. Osane kã mitsui nɔ. Misumɔɔ bo.’

Sɛɛ mli lɛ, Hana shi amɛ koni eyasɔle. Ekpa Yehowa fai kɛ yaafonui koni eye ebua lɛ. Ewo Yehowa shi akɛ: ‘Yehowa, kɛ́ ohã mi binuu lɛ, mi kɛ lɛ baahã bo koni esɔmɔ bo ewala gbii abɔ fɛɛ.’

Osɔfonukpa Eli na ni Hana miifo, no hewɔ lɛ, eyasusu akɛ etɔ dãa. Shi Hana kɛɛ lɛ akɛ: ‘Dabi, minuŋtsɔ, mitɔko dãa. Sane ko miigba minaa waa, ni mikɛ Yehowa miiwie he.’ Eli na akɛ nɔ ni ekɛɛ Hana lɛ ejaaa. No hewɔ lɛ, ekɛɛ lɛ akɛ: ‘Nyɔŋmɔ ahã bo nɔ ni otaoɔ lɛ.’ Hana tsui nyɔ emli, ni etee shĩa. Eyeee afi ni Hana fɔ binuu ni ewo lɛ Samuel. Feemɔ bɔ ni Hana mii baashɛ ehe ahã lɛ he mfoniri okwɛ.

Hana hiɛ kpaaa nɔ ni ewo Yehowa shi akɛ ebaafee lɛ nɔ. Be ni etse  Samuel fufɔ pɛ ni ekɛ lɛ ba koni esɔmɔ yɛ sɔlemɔ buu lɛ. Ekɛɛ Eli akɛ: ‘Gbekɛ nuu nɛɛ ni misɔle ni Yehowa kɛ lɛ ahã mi lɛ. Mikɛ lɛ ema Yehowa ewala gbii abɔ fɛɛ.’ Daa afi lɛ, Elkana kɛ Hana yasaraa Samuel ni amɛkɛ atade bibioo hee ni nine bɛ he yahãa lɛ. Sɛɛ mli lɛ, Yehowa hã Hana fɔ Samuel sɛɛ. Efɔ bihii etɛ kɛ biyei enyɔ.