Omuisrael wena Elkana wa ri novakazendu vevari, ooHana na Penina, posi yokutja eye wa suverere Hana tjinene. Penina aa tjiti Hana ouhahu aruhe mena rokutja Hana kari novanatje nu Penina wa ri novanatje ovengi. Ombura aihe, Elkana aa twara eṱunḓu re okukerikotamena ku Jehova mondjuwo ye ondjapuke moSilo. Otjikando tjimwe tji va ri ngo, eye wa muna kutja omukazendu we omusuverwa wa wire momuinyo. Eye wa tja: ‘Arikana Hana o riri. Ami owami ngwi nu mbe ku suvera.’

Kombunda, Hana wa ya kwarwe okukakumba erike. Eye aa riri tjinene ngunda ama kumbu ku Jehova. Eye wa kwizikira Jehova na tja: ‘Jehova, tji we ndji pe omuatje omuzandu, me mu yandja kove nu eye me ku karere oure womuinyo we.’

Omupristeri Omunene Eli, wa muna Hana ama riri, nu aa nangarasi Hana wa nḓorongo. Hana wa zira a tja: ‘Hi ya nḓoronga muhona wandje. Ami mbi nouzeu tjiri, nu me hungire kuna Jehova ohunga na wo.’ Eli wa muna kutja wa zunḓa nu e mu raere kutja, ‘Mukuru nge ku pe atjihe tji mo vanga.’ Hana wa kutukire momuinyo na yaruka konganda. Kombunda eye wa kapanduka omuatje omuzandu ne mu ruku Samuel. Mo munu kutja Hana wa tjaterwa pu pe ṱa pi?

 Hana kena pa zemba omakwizikiro nga tjita ku Jehova. Tjimanga tja za nokuisako Samuel komaihi, eye we mu twara kondjuwo yaJehova ondjapuke kutja me kemukarere ngo. Eye wa raera Eli na tja: ‘Omuzandona ngwee kumbire eye ngwi. Ami me mu yandja ku Jehova oure womuinyo we.’ Elkana na Hana aave yekutara Samuel nu ombura aihe aave mu etere ombanda ombe. Jehova wa yandja ovanatje varwe vetatu ovazandu na vevari ovakazona ku Hana.