Wan Izrɛlayt man we nem Ɛlkena bin gɛt tu wɛf dɛn. Dɛn nem dɛn na Ana ɛn Pɛnina, bɔt na Ana i bin lɛk mɔ. Pɛnina bin de provok Ana ɔltɛm bikɔs Ana nɔ bin gɛt pikin dɛn bɔt Pɛnina bin gɛt bɔku pikin dɛn. Ɛni ia, Ɛlkena bin de kɛr in famili fɔ go wɔship Jiova na di tabanakul na Shaylɔ. Wan tɛm we dɛn bin de na di tabanakul, i notis se Ana in at bin pwɛl. I bin tɛl am se: ‘Duya Ana, nɔ kray. Yu gɛt mi. A lɛk yu.’

Leta, Ana in wangren bin go fɔ go pre. I nɔ bin ebul fɔ lɛf fɔ kray we i bin de beg Jiova fɔ ɛp am. I prɔmis Jiova se: ‘Jiova, if yu gi mi bɔypikin, a go gi am to yu, ɛn i go sav yu te i day.’

We Ay Prist Ilay bin si Ana de kray, i tink se Ana dɔn chak. Ana bin ansa am se: ‘Nɔ, mi masta, a nɔ chak. A gɛt siriɔs prɔblɛm, ɛn a de tɔk to Jiova bɔt am.’ Ilay bin kam fɔ no se i tink di rɔng we bɔt Ana ɛn i tɛl am se: ‘Mek Gɔd gi yu wetin yu want.’ Dis bin mek Ana fil fayn ɛn go bak na os. Bifo wan ia, Ana bin bɔn bɔypikin ɛn i kɔl am Samiɛl. Yu ebul fɔ imajin aw dat bin mek Ana rili gladi?

Ana nɔ fɔgɛt di prɔmis we i bin mek to Jiova. As i lɛf fɔ gi Samiɛl bɔbi, i bin  kɛr am go fɔ go sav na di tabanakul. I tɛl Ilay se: ‘Dis na di bɔbɔ we a bin pre fɔ. So misɛf dɔn briŋ am bak to Jiova fɔ mek i sav am te i day.’ Ɛlkena ɛn Ana bin de go fɛn Samiɛl ɛni ia, ɛn i kin kɛr wan nyu klos we nɔ gɛt sliv fɔ am. Jiova bin mek Ana bɔn tri bɔypikin dɛn bak ɛn tu galpikin dɛn.