တၢ်မၤလိ ၃၅
နီၢ်ဃးနၤဃ့ဘါထုကဖၣ်လၢ ကဒိးန့ၢ်ဘၣ်အဖိခွါတဂၤ
ပှၤအံၣ်စရ့လးပိာ်ခွါတဂၤ လၢအမံၤမ့ၢ်စီၤအ့လကါနၤန့ၣ် အမါအိၣ်ဝဲခံဂၤလီၤ. အမါခံဂၤန့ၣ် အမံၤလၢနီၢ်ဃးနၤ ဒီးနီၢ်ပနံးနၤလီၤ. ဒီးစီၤအ့လကါနၤ အဲၣ်ဝဲနီၢ်ဃးနၤဒိၣ်န့ၢ်ဒံး နီၢ်ပနံးနၤလီၤ. ခီဖျိလၢနီၢ်ပနံးနၤ အဖိအိၣ်ဝဲအါဂၤ ဒီးနီၢ်ဃးနၤအဖိတအိၣ်ဘၣ်အဃိ နီၢ်ပနံးနၤတဲဆါဝဲနီၢ်ဃးနၤထီဘိလီၤ. ကိးနံၣ်ဒဲးန့ၣ် စီၤအ့လကါနၤဒီးအဟံၣ်ဖိဃီဖိ လဲၤဘူၣ်ထီၣ်ဘါထီၣ်တၢ်လၢ ဒဲစီဆှံလၢဝ့ၢ်ၡံလိၤအပူၤလီၤ. ဘၣ်တဘျီ ဖဲအဝဲသ့ၣ်လဲၤတုၤဝဲ လၢဝ့ၢ်ၡံလိၤအခါ စီၤအ့လကါနၤထံၣ်ဝဲလၢ နီၢ်ဃးနၤအသးအုးဒိၣ်မးလီၤ. စီၤအ့လကါနၤ တဲဘၣ်အီၤလၢ– ‘ဟီၣ်တဂ့ၤ, ယအိၣ်ဒီးနၤဒီတဂၤညါ. ယအဲၣ်နၤ.’
လၢခံ နီၢ်ဃးနၤလဲၤဃ့ဘါထုကဖၣ်တၢ် ထဲတဂၤဧိၤ လီၤ. ဖဲအဃ့ဘါထုတဖၣ်တၢ်အခါ အဝဲဟီၣ်ဝဲလီၤကၢ်လီၤကုၤဒီး ဃ့ကညးဝဲလၢ ယဟိဝၤယွၤ ကမၤစၢၤအီၤလီၤ. နီၢ်ဃးနၤအၢၣ်လီၤဝဲလၢ– ‘ယဟိဝၤယွၤဧၢ, နမ့ၢ်ဟ့ၣ်လီၤယၤဖိခွါတဂၤန့ၣ် ယကဟ့ၣ်လီၤနၤလီၤ. ဒီးယဖိခွါအံၤကမၤ နတၢ်မၤ တစိၤအသးလီၤ.’
ပှၤလုၢ်တၢ်အခိၣ် စီၤဧ့လံၤ ထံၣ်ဝဲလၢ နီၢ်ဃးနၤ ဟီၣ်သါသကုးဝဲအဃိ အဝဲဆိကမိၣ်လၢ နီၢ်ဃးနၤအီမူၤသံးလီၤ. ဘၣ်ဆၣ် နီၢ်ဃးနၤ တဲဆၢက့ၤအီၤလၢ– ‘ယကစၢ်ဧၢ, ယတမူၤသံးဘၣ်. ယအိၣ်ဒီး တၢ်ကီတၢ်ခဲဖးဒိၣ်တခါဒီး ခဲအံၤယတဲဘၣ် ယဟိဝၤယွၤလီၤ.’ ဒီးစီၤဧ့လံၤသ့ၣ်ညါဝဲလၢ အဆိကမိၣ်ကမၣ်ဘၣ် နီၢ်ဃးနၤအဃိ အဝဲတဲဘၣ်က့ၤအီၤလၢ– ‘မ်ကစၢ်ယွၤဟ့ၣ်လီၤနၤ တၢ်လၢနဃ့အီၤတက့ၢ်.’ နီၢ်ဃးနၤအသးမုာ်ထီၣ်က့ၤဒီး ဟးထီၣ်ဝဲဖဲန့ၣ်လီၤ. ဒီးလၢ တနံၣ်အတီၢ်ပူၤန့ၣ် နီၢ်ဃးနၤအိၣ်ဖျဲၣ်ထီၣ်ဝဲ ဖိခွါတဂၤဒီးကိးဝဲအမံၤလၢ စီၤၡမူၤအ့လးလီၤ. နီၢ်ဃးနၤကသးခုဝဲထဲလဲၣ်န့ၣ် ဆိကမိၣ်ကွၢ်သၢၣ်.
နီၢ်ဃးနၤတသးပ့ၤနီၣ် အတၢ်အၢၣ်လီၤအီလီၤဒီး ယဟိဝၤယွၤဘၣ်. ဖဲစီၤၡမူၤအ့လး ဖှၣ်နုၢ်အခါ အမိလဲၤဆှၢအီၤလၢ ဒဲစီဆှံလီၤ. နီၢ်ဃးနၤတဲဘၣ် စီၤဧ့လံၤလၢ– ‘ယဃ့ထုကဖၣ်လၢ ကဒိးန့ၢ်ဘၣ်ဖိခွါတဂၤအံၤအဂီၢ်လီၤ. ဒီးယအၢၣ်လီၤလၢ အဝဲကမၤယဟိဝၤယွၤအတၢ်မၤ တစိၤလၢအသးလီၤ.’ စီၤအ့လကါနၤဒီးနီၢ်ဃးနၤ လဲၤအိၣ်သကိးဝဲ စီၤၡမူၤအ့လးတနံၣ်တဘျီ ဒီးလဲၤစိာ်န့ၢ်အီၤဆ့ကၤအသီကိးဘျီဒဲးလီၤ. ယဟိဝၤယွၤ ဆိၣ်ဂ့ၤနီၢ်ဃးနၤဒီး အဝဲအိၣ်ဖျဲၣ်ထီၣ်ကဒီးဝဲ အဖိခွါသၢဂၤဒီးအဖိမုၣ်ခံဂၤလီၤ.
“ဃ့တၢ်တက့ၢ်, ဒီးတၢ်ကဟ့ၣ်သုလီၤ. ဃုတၢ်တက့ၢ်, ဒီးသုကထံၣ်န့ၢ်တၢ်လီၤ.”—မးသဲ ၇:၇